Keshe Densaýlyq saqtaý mınıstri Eljan Birtanov Ortalyq kommýnıkasııalar qyzmetinde «Koronavırýs pandemııasyna qarsy sharalar» taqyrybynda onlaın brıfıng ótkizip, vırýs taralýynyń aǵymdaǵy jaǵdaıyna toqtaldy.
Sımptomsyz naýqastar úıde oqshaýlanady
Eń aldymen E.Birtanov koronavırýs ınfeksııasy boıynsha aǵymdaǵy jaǵdaıǵa toqtaldy. «Búginde elimizde koronavırýs ınfeksııasyn 12124 adam juqtyrdy. Olardyń 77%-y – sımptomsyz naýqastar. Soǵan qaramastan barlyq tirkelgen azamattarǵa tolyq medısınalyq dıagnostıkalyq kómek memleket tarapynan tegin beriledi. Em halyqaralyq áriptestermen aqyldasqan ǵylymı jumystarǵa negizdelgen klınıkalyq hattama arqyly júrgiziledi. Bul hattamany elimizdiń eń belgili ǵalymdary ázirlep, bekitken. Epıdemııa bastalǵannan beri 8 redaksııadan ótti. Sol em-domnyń nátıjesinde 52% (6288) naýqas jazylyp shyqty. Al 5836 pasıent baqylaýda», dedi ol.
Elimizdiń bas dárigeri jaqynda ǵylymı-zertteý jumystarynyń negizinde elimizde koronavırýsqa qarsy sharalardyń taktıkasy ózgergenin jetkizdi. Iаǵnı osy aptadan bastap vırýs anyqtalǵanymen aýrý belgileri bolmaǵan naýqastar úı karantıninde bolady. «Jańa taktıka halyqaralyq standarttarǵa da saı keledi. Bul – sımptomsyz naýqastardy aýrýhanalarǵa jatqyzbaı, úı karantınine alý. Olar jergilikti emhanalardaǵy ýchaskelik dárigerlerdiń baqylaýynda bolady. Qazirgi ýaqytqa deıin sondaı jeńil deńgeıdegi naýqastar ınfeksııalyq aýrýhanalarda jatyr. Osy aptadan bastap osy hattamany engizdik. Qazir stasıonarda jatqan 5836 naýqastyń 59-ynyń (1%) hali nashar. 600-deı (10%) pasıenttiń jaǵdaıy ortasha deńgeıde. Taǵy 10%-nyń aýrýy jeńil bolsa, 78%-y (4500 adam) – sımptomsyz», dedi E.Birtanov.
Keıbir osyndaı aýrý belgileri esh baıqalmaǵan naýqastardyń aýrýhanaǵa jatýdan bas tartyp jatqanyn aıtqan mınıstr: «Muny durys túsiný kerek. Ol ınfeksııany basqalarǵa juqtyrýy múmkin. Sondyqtan olardyń aýrýhanada nemese úıde óz ózin oqshaýlaýy óte mańyzdy», dedi.
Jańa karantındik sharalardy engizýge quqymyz bar
Densaýlyq saqtaý mınıstri koronavırýs órshı túsken óńirlerdi atady. «Sońǵy eki aptada karantın sharalarynyń bosaýyna baılanysty keıbir óńirlerde naýqastardyń sany kóbeıip keledi. 15-24 mamyr aralyǵynda jańadan 2800 naýqas tirkelse, 25 mamyrdan shildeniń 3-ine deıin vırýs juqtyrǵandardyń sany 3,5 myńǵa jetti. Iаǵnı ósim 25%-ǵa kóterildi. Atap aıtqanda, ósim deńgeıi 6 óńirde joǵary. Jaqynda ǵana vedomstvoaralyq komıssııanyń otyrysy ótti. Keıbir óńirler boıynsha biz aqparat berip jatyrmyz. Mysaly, Mańǵystaý, Batys Qazaqstan, Qyzylorda, Shyǵys Qazaqstan oblystarynda joǵary ósim bolǵan. Biraq qazir jaǵdaı turaqtalyp kele jatyr. Sol sııaqty Nur-Sultan qalasynda da biraz ósim boldy. Bul qazir 2 paıyzǵa tómendedi», dedi E.Birtanov.
Ár óńirde epıdemııalyq jaǵdaıǵa baılanysty erekshe shekteý sharalary engiziletinin atap ótken E.Birtanov: «О́ńirlerde shekteý sharalaryn engizýge bas sanıtarlyq dárigerlerdiń quqyqtary bar. Arnaıy shekteýler ósim deńgeıi joǵary aýdandarǵa engiziledi. Mysaly, Atyraý oblysynyń bir ǵana Teńiz kenishinde ósim joǵary bolyp, basqa eldi mekenderde jaǵdaı durys bolǵannan keıin tek qana sol aýdanǵa shekteý sharalary engiziledi. Biz sanıtarlyq qyzmet retinde azamattarymyzdyń densaýlyǵy men ómirin qorǵaýǵa shaqyrdyq, qajet bolǵan jaǵdaıda jańa karantındik sharalardy kúsheıtýge jáne engizýge quqymyz bar», dedi.