Elektr energetıkasyn damytý jáne energııa únemdeý ınstıtýty» AQ ókilderi Germanııanyń «Dena» energetıkalyq agenttigimen 2030 jylǵa deıin Qazaqstan ekonomıkasynyń túrli sektorlarynyń energııa tıimdiligin arttyrý boıynsha jospardy ázirleýge qatysty onlaın kezdesý ótkizdi, dep habarlady IIDM baspasóz qyzmeti.
О́tken jyldyń jeltoqsan aıynda Memleket basshysy Qasym-Jomart Toqaevtyń Germanııaǵa sapary aıasynda «Elektr energetıkasyn damytý jáne energııa únemdeý ınstıtýty» AQ, «Atameken» UKP jáne «Dena» energetıkalyq agenttigi arasynda Qazaqstannyń energııa tıimdiligin arttyrý boıynsha jospar ázirleý men yntymaqtasty damytý týraly úsh jaqty memorandýmǵa qol qoıylǵan edi.
Memleket basshysy Qasym-Jomart Toqaev tótenshe jaǵdaı jónindegi memlekettik komıssııanyń qorytyndy otyrysynda elimizdiń energetıka sektory reformalardy talap etetinin atap ótti. Aldaǵy ýaqytta «jasyl energetıkaǵa» qaraı qozǵalys jasaýǵa erekshe mańyz beriledi.
Eki el arasyndaǵy ózara is-qımyldy odan ári jandandyrý maqsatynda Germanııanyń Federaldyq ekonomıka jáne energetıka mınıstrliginiń tapsyrmasymen «Dena» energetıkalyq agenttigi ózara kooperasııany damytý baǵytynda jumys tobyn qurýdy qolǵa aldy. Ondaǵy maqsat - energetıka salasyndaǵy birlesken yntymaqtastyqtyń strategııalyq baǵytyn aıqyndaý.
Qazir uzaq merzimdi jospardy ázirleý boıynsha belsendi jumys bastaldy. Jospar el ekonomıkasynyń ár sektory boıynsha jeke energııa tıimdiliginiń áleýetin aıqyndap, energetıka, ónerkásip, bıýdjet sektory men ǵımarattar, kólik sektorlarynyń qazirgi jaı-kúıin eskerip, naqty qol jetkiziletin kórsetkishtermen ázirlenedi.
Jospardy ázirleý bes negizgi kezeńge bólingen: 1) uıymdyq qurylymdy qalyptastyrý 2) energııa únemdeý salasyndaǵy aǵymdaǵy jaǵdaıdy taldaý, 3) is-sharalardy irikteý, 4) sandyq kórsetkishterdi aıqyndaý 5) naqty jospardy bekitý. Aǵymdaǵy jyly osylardyń tórt kezeńin iske asyrý kózdelgen.
Germanııa jaǵy jobany qarjylandyrýǵa daıyn. Sonymen qatar, Dúnıejúzilik bank ekonomıka sektorlarynyń energııa tıimdiligin arttyrý josparyn ázirleý jónindegi bastamany qoldap, tehnıkalyq kómek kórsetýge ázir.
Jyl sońyna deıin elimizdegi energııa únemdeýdiń qazirgi jaǵdaıyna tolyqtaı taldaý júrgizý josparlanyp otyr. Sondaı-aq, ekonomıkanyń túrli sektorlarynda energııa únemdeý áleýetin anyqtaý kózdelgen. Osy jyldyń tamyz aıynda energııa tıimdiligin arttyrý boıynsha is-sharalardy aldyn ala irikteý bastalady. Sońǵy joba 2021 jyly ázirlenedi.
Jospardyń túpki maqsaty - energııa tıimdiligin arttyrý boıynsha eldiń tıimdi strategııasyn ázirleý. Bul bıýdjet qarajatyn únemdeýge jáne Qazaqstan JIО́-niń energııa syıymdylyǵyn azaıtýǵa múmkindik beredi.