Keshe Qazaqstan Respýblıkasynyń Premer-Mınıstri Kárim Másimov jumys saparymen Lıvan Respýblıkasynda boldy, dep habarlady Premer-Mınıstrdiń baspasóz qyzmeti.
Kárim Másimovtiń osy eldiń Premer-mınıstri Saad ál-Harırımen kezdesýinde ekijaqty saýda-ekonomıkalyq qyzmettestikti damytýdyń keıbir máseleleri talqylandy.
Al Lıvan Prezıdenti Mıshel Sýleımanmen bolǵan kezdesýde Qazaqstan men Lıvan arasyndaǵy ekijaqty ekonomıkalyq yntymaqtastyq jóninde pikir almasyldy. Ekonomıkalyq ózara yqpaldastyqty tereńdetý úshin barlyq jaǵdaılardyń jasalǵany atap ótildi. Taraptar osy úderistiń belsendiligin arttyra túsýge degen ózderiniń múddelilikterin bildirdi.
Sapar barysynda sondaı-aq Lıvan Syrtqy ister mınıstri Alı Hasan ál-Shamımen kelissózder júrgizilip, óńirlik qyzmettestikti nyǵaıtý máseleleri talqylandy. Biz Lıvandy Qazaqstan Prezıdentiniń bastamasymen qurylǵan Azııadaǵy ózara is-qımyl jáne senim sharalary jónindegi keńes úderisine qatysýshy bolýǵa shaqyramyz, dedi K.Másimov. Alı Shamı Lıvannyń Azııadaǵy turaqtylyq pen qaýipsizdikti nyǵaıtý úderisine atsalysýǵa múddeli ekenin jetkizdi.
Resmı sapar sheńberinde Qazaqstan Úkimetiniń basshysy K.Másimov Lıvan Parlamentiniń tóraǵasy Nabıh Berrımen kelissózder júrgizdi. Onda eki el arasyndaǵy ekonomıkalyq baılanystardy neǵurlym tereńdete túsý máseleleri qaraldy.
Premer-Mınıstr K.Másimov bastaǵan qazaqstandyq delegasııanyń resmı sapary sońynda Úkimet úıinde keńeıtilgen quramda ekijaqty kelissózder ótti.
Kezdesý kezinde eki eldiń ekonomıkanyń túrli salalary, atap aıtqanda, aýyl sharýashylyǵy, týrızm jáne qarjy sektory boıynsha qyzmettestik jaǵdaıy óte nátıjeli túrde talqylandy. Biz Taıaý Shyǵystaǵy ahýaldy jáne eki eldiń beıbitshilikti qamtamasyz etýdegi múmkindikterin talqyladyq, dep atap ótti Kárim Másimov kezdesý sońynda.
Kezdesý qorytyndysynda Qazaqstan jáne Lıvan syrtqy ister mınıstrlikteri arasynda ózara saıası konsýltasııalar týraly memorandýmǵa qol qoıyldy.