"ArselorMıttal Temirtaý" AQ Kómir departamentine qarasty Túsip Kúzembaev atyndaǵy shahtada jańa lava iske qosyldy, - dep habarlaıdy Egemen.kz Qaraǵandy oblysy ákiminiń baspasóz qyzmetine silteme jasaı otyryp.
Mundaı nátıjege qol jetkizý úshin úsh birdeı úńgileý brıgadasy bolashaq lavaǵa arnalǵan tazartý ýchaskesin jyl boıy daıarlapty. Qajetti jabdyqty qurastyrýdyń ózine úsh aı ýaqyt jumsalǵan.
Jańa lavada mehanıkalandyrylǵan Glınık 22-45 kesheni, SL300 tazalaý kombaıny, kenjar konveıeri jáne basqa da jabdyqtar ornatylǵan.
"Ken baıytý fabrıkalary men metallýrgııa kombınatyna jóneltiletin kokstenetin K10 kómiriniń qory shamamen 800 myń tonnany quraıdy. Atalǵan ýchaskede jaǵdaı jaman emes: ondaǵy tehnıka da senimdi. Onymen biz birneshe jyldan beri jumys istep kelemiz. Aldymyzǵa qoıǵan mindetterdi tolyǵymen oryndap shyǵamyz dep senimdi túrde aıtýǵa bolady", – deıdi T.Kúzembaev atyndaǵy shahtanyń dırektory Sergeı Potemkın.
Úńgileýshiler brıgadıri Gennadıı Valıavskıı jańa lavany iske qosý maqsatynda jumystyń óte qarqyndy júrgizilgenin aıtady. Olar aı saıyn 90-100 metrden qazyp otyrypty.
Jýyrda ǵana memlekettik komıssııanyń qabyldaýynan ótken "44k10-v" atty jańa lava qazirgi ýaqytta ken óndirý jumystaryn bastap ketti.