Búgin dańqty norvegııalyq shańǵyshy Bıorn Delıdiń týǵan kúni. Álemdik sport tarıhynda óshpes iz qaldyrǵan aıtýly azamat 53 jasqa tolyp otyr, dep habarlaıdy Egemen.kz
Bıorn Delı 1967 jyldyń 19 maýsymynda Norvegııanyń Hedmark óńirinde dúnıege keldi. Bozbala shaǵynan shańǵy sportyn serik etken ol ýaqyt oza óz dáýiriniń teńdessiz tulǵalarynyń birine aınaldy. Skandınavııalyq sańlaq óziniń sporttyq karerasynda Olımpıadanyń 8 altyny men 4 kúmisine ıelendi. Álem chempıonatynda 9 altyn, 5 kúmis jáne 3 qola medaldi oljalady. Odan bólek, kóptegen asa iri halyqaralyq jarystardyń jeńimpazy atanyp, san márte rekordtyq kórsetkishterdi jańartty. Qysqy sport túrleri tarıhynda jeńip alǵan ataq-dańqy jaǵynan Delımen teńese alatyn sańlaqtar kemde-kem.
2001 jyly sporttyq mansabyn aıaqtaǵannan keıin Bıorn kásipkerlikpen aınalysty. Qurylys pen turǵyn úı jáne sán bıznesin dóńgeletip áketti. Sonymen qatar, shańǵy sportyna arnalǵan brendtik kımider shyǵaryp, norvegııalyq telearnalarda shoý-baǵdarlamalar uıymdastyrdy.
Qazaqstandyq jankúıerlerge de Bıorn Delıdiń esimi etene tanys. Sebebi ol uzaq jyldar boıy Olımpııa oıyndary men álem chempıonattarynda san márte atoı salǵan bizdiń áıgili shańǵyshymyz Vladımır Smırnovtyń dúbirli dodalardaǵy basty qarsylastarynyń biri boldy.