Test kún saıyn ótkiziletin bolady jáne túlekterdiń qaýipsizdigi tolyqtaı saqtalǵan, dep habarlaıdy elorda ákimdiginiń resmı saıty.
Nur-Sultandaǵy ulttyq biryńǵaı testileý (UBT) 21 maýsym men 5 shilde aralyǵynda úsh ýnıversıtette: L.Gýmılev atyndaǵy Eýrazııa ulttyq ýnıversıtetinde (2 589 oqýshy, 13 aýdıtorııa), S.Seıfýllın atyndaǵy Qazaq agrotehnıkalyq ýnıversıtetinde (1818 oqýshy, 7 aýdıtorııa) jáne Qazaq ekonomıka, qarjy jáne halyqaralyq saýda ýnıversıtetinde (1884 oqýshy, 13 aýdıtorııa) ótedi.
UBT ótkizý oryndary barlyq qajetti qural-jabdyqtarmen qamtamasyz etilgen. Bıyl lek sany eki ese artyp, barlyǵy 14 lekke jetti. Osylaısha test ótken oqý jylyndaǵydaı kúnara emes, kún saıyn ótkiziletin bolady. Testileý kezinde polısııa qyzmetkerleri qoǵamdyq tártipti qamtamasyz etedi.
Túlekterdiń ata-analary úıde qalýy tıis. Olar úshin aýdıtorııalardan onlaın kórsetilim uıymdastyrylady. Synyptarda ústelder arasyndaǵy qashyqtyq keminde eki metr bolýy kerek. Nusqaýlyqta jazylǵandaı dezınfeksııa quraldarymen qamtamasyz etý (respıratorly maskalar, qolǵaptar, sanıtaızerler); termometrııanyń saqtalýy, tekseriletin adam men qyzmetker arasyndaǵy qashyqtyq keminde bir metr bolýy; ýnıversıtetterdiń aýdıtorııalarynda sanıtarlyq-dezınfeksııa rejımin saqtaý; jeldetý júıeleri men aýa baptaý júıeleriniń jumysyn qadaǵalaý qajet. UBT kezinde qoǵamdyq tártipti 100 polısııa qyzmetkeri men 10 arnaıy kólik qamtamasyz etedi.
Sonymen qatar 9 medısına qyzmetkeri jáne úsh jedel járdem jumyldyryldy. 24 qyzmetker órt qaýipsizdigin qadaǵalaıdy, 46 avtobýs qala shetinde turatyn 540 túlekti tasymaldaýdy qamtamasyz etedi. Bıyl UBT-ǵa qatysý úshin 95% nemese 6255 adam, onyń ishinde 3661-i qazaq, 2554-i orys, 40-y aǵylshyn tilinde ótinish berdi.