Oblys ortalyǵy Túrkistanda keıingi jyldary halyq sany artqan. Osy turǵyda turǵyndardy baspanamen qamtý – ózekti máseleniń biri. Odan bólek, qalada 95 myńnan asa adam jeke turǵyn úı salý úshin tegin jer telimin alý kezeginde tur. Olardyń aldy 25 jyldan beri kezegin kútip júr. Al qalada 2005 jyldan bastap jer berý toqtatylǵan.
Bul máseleler oblys ákimi Nuralhan Kósherovtiń Túrkistan qalasy turǵyndarymen kezdesýinde kóterildi. Qala ákimi Ázimbek Pazylbekulynyń málimdeýinshe, qurylys jumystarynyń kólemi 275,4 mlrd teńgeni qurap, ótken jyly jospar 112,5% deńgeıinde oryndalǵan. Paıdalanýǵa berilgen turǵyn úı kólemi 552,6 myń sharshy metrdi qurap, jospar 102,2%-ǵa oryndalypty. Mysaly, Jańa qala shaǵyn aýdanynda keıingi 3 jylda 67 kópqabatty turǵyn úı paıdalanýǵa berilgen.
Degenmen turǵyn úı máselesi ózekti kúıinde qalyp otyr. Bul oraıda oblys ákimi aldaǵy jyldarǵa jospar qurýdy tapsyrdy. Jer telimin alý kezeginde turǵan turǵyndardyń máselesine qatysty oblys ákimdigi arnaıy joba ázirlegeni, oǵan saı 1 600-den asa kezekte turǵan adamǵa jer beriletini aıtyldy. Oblys ákimine kókeıde júrgen máselesin jetkizgen túrkistandyq azamat turǵyn úı kezeginen shyǵarylýyna baılanysty narazylyǵyn bildirip, qyzyna memleket tarapynan berilgen páterdiń sapasyna shaǵymdandy. О́tinish ıesiniń atynda úı bolǵandyqtan, turǵyn úı kezeginen shyǵarylǵan. Degenmen bul másele zerdelenip, zań aıasynda sheshimin tabady.
Qurylys sapasyna qatysty merdigerlerge kemshilikti qalpyna keltirýge ýaqyt berildi. Budan bólek, kópqabatty turǵyn úılerdi basqarý kompanııasynyń sapasyz jumysy, jóndeý jumystarynyń sapasy, beınebaqylaý kameralarynyń isten shyǵýy, turǵyn úı aýlalaryn abattandyrý boıynsha máseleler aıtyldy.
Jer telimin alýǵa qatysty túıtkilder de kóterildi. Sonymen qatar psıhologııalyq-pedagogıkalyq túzetý ortalyǵyn ashý qajettiligi týraly usynys bildirildi. Jalpy, kezdesýde qala tirshiligine qatysty kóterilgen másele az bolmady. Bul oraıda oblys ákimi qala basshysyna keıbir qajetsiz jobalardy toqtatyp, halyqtyń suranysyna qajet dúnıelerdi sheshý kerektigin aıtty.
– Qala turǵyndary óz máseleleri boıynsha qala ákimine keledi. Biraq olar sizdiń jaýabyńyzǵa qanaǵattanbaı, sosyn oblys ákimine aryz-shaǵymyn joldaıdy. Mysaly, byltyrdyń ózinde 363 qala turǵyny oblys basshysynyń jeke qabyldaýyna jazyldy. Osylardy tolyq ári jan-jaqty zerdelep, qala deńgeıinde sheshýdi tapsyramyn, – dedi Nuralhan Kósherov qala ákimi Ázimbek Pazylbekulyna.
Byltyrǵy jumystar jóninde baıandama jasaǵan qala ákimi jalpy óńirlik ónim kólemi 526,3 mlrd teńgege jetip, 16,3%-ǵa artqanyn, ónerkásip óniminiń kólemi 45,9 mlrd teńgeni qurap, óńdeý ónerkásibi 29 mlrd teńgege jetkenin atap ótti. Negizgi kapıtalǵa tartylǵan ınvestısııalar 502,7 mlrd teńgege deıin ulǵaıdy. Sondaı-aq saýda kólemi 193,9 mlrd teńgege jetip, jospar 161,9%-ǵa artyǵymen oryndalǵan.
– Qazir qalanyń ekologııalyq ahýalyn jaqsartý, turǵyndarǵa qoǵamdyq jaıly orta qalyptastyrý maqsatynda júıeli jumys júrgizilip jatyr. Atap aıtqanda, ótken jyly qala aýmaǵynda 36 saıabaq, 80 gúlzar men alleıa, 168 kóshe, 16 jasyl alqap aýmaǵynda kógaldandyrý jumystary júrgizildi. Jalpy alǵanda, 1,4 mıllıonnan astam aǵash, 410 myńnan astam buta otyrǵyzylyp, jasyl jelek kólemi ulǵaıtyldy, – dedi Ázimbek Pazylbekuly.
Eseptik kezdesýde turǵyndar tarapynan jerdi zańdastyrý, baspanamen qamtý, ınfraqurylym, qoǵamdyq kólik, turǵyn úılerdegi kemshilikter, áleýmettik qoldaý, turǵyn úı-kommýnaldyq sharýashylyq, jol sapasy, bilim, týrızmdi damytý, áleýmettik nysandar qurylysy, ózge de máseleler qozǵaldy.
– Memleket basshysynyń «Halyq únine qulaq asatyn memleket» tujyrymdamasyna sáıkes, oblys ákimderine barlyq aýdan, qalalardyń turǵyndarymen kezdesip, máselelerdi ashyq dıalog alańynda sheshý mindettelgen. Byltyrǵy kezdesýde Túrkistan qalasy boıynsha 17 másele kóterilgen. Olardyń 16-sy sheshimin tapty, 1 másele bıyl sheshiledi. Turǵyndar tilegine oraı sport keshenderiniń qurylysy aıaqtalyp, qoldanysqa berildi. Odan bólek, 111 kóshege asfalt tóseldi. Osynyń barlyǵy sizderdiń qala turǵyny retinde belsendi ustanymdaryńyz ben jergilikti ákimdikpen birlese atqarǵan jumystardyń nátıjesinde júzege asty, – dedi N.Kósherov.
Oblys ákimi kezdesýden soń jeke qabyldaý ótkizdi. Turǵyndar kótergen máselelerge qatysty tıisti basqarmalar men jaýapty mekemelerge zań aıasynda jan-jaqty zerdelep, naqty sheshim qabyldaý jóninde tapsyrma berildi. Birqatar másele sol mezette sheshimin tapty. О́ńir basshysy halyqpen keri baılanysty kúsheıtý, áleýmettik mańyzy bar máselelerdi kezeń-kezeńimen sheshý jumystary jalǵasatynyn aıtty.
Túrkistan oblysy