Rýdnyı mýzykalyq kolledjiniń stýdenti Mark Lı Mahambet kúılerin naqyshyna keltirip oryndaıdy. Jas kúıshi ulttyq aspapty naǵashy atasynan úırengen. Bala kezinen sol kisiniń qasynda júrip, dombyra únin boıyna sińirip ósken daryndy jas búginde 60-tan asa kúı biledi.
Mark Lı qazir atalǵan kolledjde sabaq beretin ustazy, óńirge belgili kúıshi Murat Hamıtovten dáris alady. Bilim ordasynda 15 jyldan beri ustazdyq etip kele jatqan tájirıbeli ustaz shákirtteriniń birazy búginde Qurmanǵazy atyndaǵy konservatorııada oqıdy. Keıbir shákirtteri sol konservatorııada qalyp, jumys istep jatyr.
«Marktiń kúıge degen yqylasynyń erekshe ekeni birden baıqaldy. Qazir oryndaýshylyq tehnıkasy ábden qalyptasty. Endi ár týyndynyń ishki mán-maǵynasyna úńilip, túsinip oryndaýǵa tyrysyp júr. Kúrdeli kúılerdiń tereń ıirimderin jeter jerine jetkizip tirilte oınaǵanda marqaıyp qalasyń», deıdi M.Hamıtov.
Qazir Marktiń kúı qorjynynda Mahambettiń «Joryq», «Qaıran Naryn», «Jaýǵa shapqan», «Jumyr qylysh» kúıleri bar.
«Batyr babamyzdyń kúıleri óte rýhty. Adamnyń boıyna qaırat, jiger beredi. Sondyqtan janyma óte jaqyn. Kúıdi úırenbes buryn, onyń shyǵý tarıhyna boılap, ábden túsinip oqyp, bilip alý kerek. Kez kelgen kúı jaıdan-jaı shyǵa salmaıdy. Kúıdiń shyǵýyna belgili bir tarıhı oqıǵalar, avtordyń basynan ótken jaǵdaılar túrtki bolady. Sondyqtan aldymen shyǵarmanyń mán-maǵynasyn túsinip baryp oryndaý kerek», deıdi jas ónerpaz.
Qostanaı oblysy