SpaceX kompanııasy aksııalaryn satylymǵa shyǵarǵannan keıin amerıkalyq kásipker Ilon Masktyń baılyǵy 1 trıllıon dollardan asyp, ol alǵashqy trıllıoner atandy, dep habarlaıdy Egemen.kz.
SpaceX bir aksııany 135 dollardan baǵalap, 555,6 mıllıon aksııany bastapqy jarııa ornalastyrý aıasynda satqan. Nátıjesinde kompanııa 75 mıllıard dollar ınvestısııa tartqan. Bul álem tarıhyndaǵy eń iri IPO retinde tirkeldi.
Kompanııa aksııalarynyń saýdasy búgin, 12 maýsymda Nasdaq bırjasynda bastalady. Alǵashqy baǵalaý boıynsha SpaceX-tiń naryqtyq quny 1,77 trıllıon dollarǵa jetken.
Sarapshylardyń esepteýinshe, Ilon Masktyń SpaceX-tegi úlesiniń quny shamamen 866 mıllıard dollardy quraıdy. Al Tesla men ózge de aktıvterin qosa eseptegende kásipkerdiń jalpy baılyǵy 1,1 trıllıon dollardan asady.
Osylaısha, Mask álemdegi baılyǵy 1 trıllıon dollar mejesinen asqan alǵashqy adam atanyp otyr. Salystyrý úshin aıtsaq, álemdegi eń baı adamdar tiziminde ekinshi orynda turǵan Alphabet kompanııasynyń negizin qalaýshy Larrı Peıdjdiń baılyǵy shamamen 300 mıllıard dollardy quraıdy.
Sonymen qatar SpaceX tabys jolynda iri shyǵyndarǵa da tap bolyp otyr. Kompanııa 2025 jyly 18,67 mıllıard dollar tabys tapqanymen, 4,94 mıllıard dollar shyǵynǵa ushyraǵan. Al 2026 jyldyń alǵashqy toqsanynda 4,7 mıllıard dollar kiris kórsetkenimen, 4,28 mıllıard dollar kóleminde shyǵyn tirkelgen.
Shyǵyndardyń basym bóligi Starship aýyr zymyran júıesin synaqtan ótkizý jumystaryna jumsalǵan.
Eske sala keteıik, buǵan deıin Ilon Mask OpenAI men onyń basshysy Sem Altmanǵa qarsy sot isinde jeńilip qalǵan edi. OpenAI isinen keıin de kásipker sot sheshimin synǵa alyp, úkimge shaǵym túsiretinin málimdedi.