Elimizdiń ulttyq quramasy men Groznyıdyń «Ahmad» klýby sapynda óner kórsetetin Maksım Samorodov Reseı Premer-lıgasyndaǵy eń qundy fýtbolshylardyń TOP-ondyǵyna endi. 23 jastaǵy aqtóbelik shabýylshy 3,5–4,1 mln eýroǵa baǵalanyp otyr. Eń qundy oıynshylardyń tizimi mynadaı: Alekseı Batrakov («Lokomotıv», Moskva) – 29–33 mln, Pedro Enrıke («Zenıt») – 28–32 mln, Matveı Kıslıak (SSKA) – 27–31 mln, Edýard Spersıan («Krasnodar») – 15-18 mln, Konstantın Tıýkavın («Dınamo», Máskeý) – 15–18 mln, Manfred Ýgalde («Spartak») – 9–11 mln, Veldın Hodja («Rýbın») – 5,2–6,1 mln, Dmıtrıı Pestrıakov («Akron») – 5,2–6 mln, Braıan Hıl («Baltıka») – 4,3–5 mln eýro.
Fýtboldan elimizdiń áıelder quramasy 2027 jylǵy álem chempıonatynyń irikteý týrnıriniń alǵashqy kezeńinen súrinbeı ótti. S6 tobynda saıysqa túsken qyzdarymyz jeti upaı jınap, ekinshi orynǵa taban tiredi. Kósh basynda – Belarýs. Armenııa úshinshi oryndy qanaǵat tutty. Sóıtip, elimizdiń aıaqdop sheberleri pleı-off kezeńine shyqty. Endi kimmen kezdesetinimiz 18 maýsymda Nonda ótetin jerebe tartý rásiminen keıin belgili bolady.
19 jastaǵy elimizdiń daryndy ústel tennısshisi, bes dúrkin el chempıony, birqatar halyqaralyq jarystyń jeńimpazy, júldegeri Alan Qurmanǵalıev Fransııanyń «Annebon» klýbymen kelsimshartqa otyrdy. Atalǵan komanda óz memleketiniń ishki birinshiliginde bes márte bas júlde oljalap, Eýropa kýbogin eki ret jeńip alǵan.
19–24 maýsym aralyǵynda Nıý-Delıde (Úndistan) semserlesýden Azııa chempıonatynyń jalaýy jelbireıdi. Jarysta elimizdiń namysyn myna sportshylar qorǵaıdy: Rýslan Qurbanov, Erlik Sertaı, Nıkıta Jýlınskıı, Kırıll Prohodov, Vladıslava Andreeva, Irına Bakaldına, Sofııa Nıkolaıchýk, Darıa Samodelkına (shpaga), Artıom Sarkısıan, Baqdáýlet Quralbekuly, Janat Nábıev, Nazarbaı Sattarhan, Áıgerim Sarybaı, Karına Dospaı, Qaısha Janybek, Anastasııa Gýlık (qylysh), Temirlan Qalıev, Ǵalym Nurymov, Tımofeı Semenov, Sofııa Aqtaeva, Alıona Gnoeva, Alına Iskanderova (rapıra).
Shtýtgart (Germanııa) qalasynda shymyldyǵy túrilgen ATR týrnıriniń tusaýkeser kezdesýinde Aleksandr Býblık jergilikti Iаn-Lennard Shtrýfpen sheberlik baıqasty. Dál osy tennısshiden jerlesimiz jıi jeńilip júr. Kúni keshe ǵana Parıjde ótken «Rolan Garrostyń» alǵashqy aınalymynda Iаn Aleksandrdan aılasyn asyrǵan edi. Bul joly Býblıktiń baǵy jandy – 7:6, 3:6, 6:2.