Otandyq kolledj oqytýshysy ozyq tájirıbesi úshin halyqaralyq syılyq ıelendi. Bul marapat – bilim salasyndaǵy úzdik jumystar men nátıjelerdi baǵalap, ony keń arenada nasıhattaýdy maqsat etetin joba. ETF NEW LEARNING AWARD – oqý úderisindegi sátti shyqqan jobalardy iriktep, jahandyq deńgeıde taratýǵa baǵyttalǵan bedeldi bastama.
Baıqaýǵa álemniń túrli elderinen pedagogter qatysyp, ózderiniń ınnovasııalyq ádistemelerin usynady. SCAFFOLD tehnologııasy 2024 jyldan beri, Beısen Ahmetov atyndaǵy joǵary pedagogıkalyq kolledjde oqý úderisinde qoldanylyp keledi. Gúlmıra Meshitbaeva usynǵan joba «Bastaýysh bilim berý» mamandyǵy stýdentterin daıarlaýda qoldanylatyn SCAFFOLD kartalaryna negizdelgen. Bul ádisteme stýdentterdiń sıfrlyq tehnologııalardy tıimdi qoldanýyna múmkindik berip, oqý úderisin jańa deńgeıge kótergen. Nátıjesinde, bolashaq muǵalimder beınematerıaldar men ártúrli deńgeıdegi tapsyrmalardy qamtıtyn bilim berý jobalary men saıttar ázirleýdi meńgergen.
Atalǵan jobalar bastaýysh synyp oqýshylaryn oqytýda zamanaýı tásilderdi engizýge jol ashyp qana qoımaı, pedagogterge ádistemelik qoldaý kórsetýge, ata-analarǵa praktıkalyq usynymdar berýge de baǵyttalǵan. Halyqaralyq sarapshylar qazaqstandyq pedagogtiń tájirıbesin joǵary baǵalap, jumysty «Scaffold quraldaryn paıdalaný arqyly muǵalimderdiń múmkindikterin keńeıtý» nomınasııasy boıynsha «INSPIRATION AWARD» syılyǵyna laıyq dep tanydy. Sonymen qatar Gúlmıra Meshitbaevaǵa óz tájirıbesin Belgııanyń Brıýssel qalasynda ótetin halyqaralyq konferensııada tanystyrý múmkindigi berildi.
Arýjan DOSYMHAN,
QarUZÝ stýdenti