Prezıdenttiń Ulttyq quryltaıdyń Qyzylorda qalasynda ótken V otyrysynda bergen tapsyrmasyn oryndaý aıasynda Jarkent meshiti jáne Voznesensk shirkeýi IýNESKO-nyń búkilálemdik mura nysandarynyń aldyn ala tizimine engizildi (Tentative List). Bul týraly Memlekettik keńesshi Erlan Qarın áleýmettik jelidegi paraqshasynda habarlady.
Onyń aıtýynsha, Jarkent meshiti HIH ǵasyr sońyndaǵy dinı sáýlet óneriniń biregeı eskertkishi sanalady. Sonymen qatar ony ıslam sáýlet dástúri men Shyǵys Azııa qurylys óneri sınteziniń jarqyn mysaly deýge bolady.
Injenerlik jáne kórkemdik ádis-tásilderimen tanymal bolǵan Voznesensk shirkeýi – HH ǵasyrdyń basyndaǵy pravoslav aǵash sáýlet óneriniń ozyq úlgisi.
«Bul nysandardyń tizimge birge usynylýy elimizde mádenı áralýandyqtyń bar ekenin ańǵartady. Sondaı-aq Ortalyq Azııa aımaǵynda ıslam jáne hrıstıan dástúrleriniń úılesimdi túrde qatar damyǵanyn, bir-birine yqpal etýdiń tarıhı tájirıbesi qalyptasqanyn kórsetedi. Meshit pen shirkeýdiń aldyn ala tizimge engizilýi – Qazaqstannyń mádenı muralaryn saqtaý jáne olardy dáripteý isiniń mańyzdy kezeńi. Bul qadam IýNESKO-nyń rásimderi men talaptaryna sáıkes nomınasııa qujattaryn ázirleýge negiz bolady», dep jazdy E.Qarın.