Astanada jalpy bilim beretin pánder boıynsha 7-8 synyp oqýshylaryna arnalǵan respýblıkalyq olımpıadanyń jeńimpazdary marapattaldy, dep habarlaıdy Egemen.kz.
Olımpıadanyń qorytyndy kezeńine elimizdiń barlyq óńirlerinen 547 oqýshy qatysyp, nátıjesinde 240 oqýshy júldeli oryndarǵa ıe boldy.
Olımpıada jaratylystaný-matematıkalyq jáne qoǵamdyq-gýmanıtarlyq baǵyttar boıynsha ótkizildi.Baıqaýdyń negizgi maqsaty – oqýshylardyń pándik olımpıadalarǵa qyzyǵýshylyǵyn arttyrý, ǵylymı bilimdi nasıhattaý, daryndy balalardy anyqtaý jáne olardyń zııatkerlik áleýetin damytý. Sonymen qatar, halyqaralyq olımpıadalarǵa qatysatyn oqýshylardy irikteý men daıarlaý, elimizde bilim berý bedelin arttyrý kózdelgen.
Tórt kúnge sozylǵan bilim dodasynyń qorytyndysy boıynsha jeńimpazdar men júldegerler I, II jáne III dárejeli dıplomdarmen, sondaı-aq altyn, kúmis jáne qola medaldarmen marapattaldy. Nátıjesinde 45 oqýshy I oryn, 76 oqýshy II oryn, 119 oqýshy III oryn ıegeri atandy.
Komandalyq esep boıynsha eki baǵytta da úzdik komandalar anyqtaldy.
Qoǵamdyq-gýmanıtarlyq baǵytta boıynsha gran-prı «NIS» DBBU komandasyna buıyrdy. I oryn – Almaty qalasy komandasyna, II oryn – Túrkistan jáne Jetisý oblystary komandalaryna, III oryn – Shymkent qalasy, Pavlodar, Mańǵystaý jáne Aqmola oblystary komandalaryna berildi.
Jaratylystaný-matematıkalyq baǵytta gran-prı Atyraý oblysy komandasyna tabystaldy. I oryn «NIS» DBBU jáne Almaty qalasyndaǵy KeAQ «RFMM» komandalaryna berildi. II oryn – Pavlodar jáne Mańǵystaý oblystary komandalaryna, III oryn – Astana qalasy jáne Aqtóbe oblysy komandalaryna buıyrdy.
Olımpıada qorytyndysy elimizdegi daryndy oqýshylardy qoldaý júıesiniń tıimdiligin jáne óńirler arasyndaǵy bilim sapasynyń joǵary deńgeıin kórsetti.
Aıta keteıik, Astanada geografııadan ulttyq olımpıada jeńimpazdary anyqtaldy.