Derekterdi óńdeý ortalyqtaryn damytý jaıy pysyqtaldy

Jıynda Premer-mınıstr­diń orynbasary – Jasandy ıntellekt jáne sıfrlyq damý mınıstri Jaslan Mádıev, «Qazaq­­telekom» AQ basqarma tór­aǵasy Baǵdat Mýsın joba­nyń bıylǵy qańtar aıynda Pavlodar oblysy Ekibastuz qalasynda iske qosylǵannan bergi atqarylǵan jumys týraly baıandady.

Ortalyq Azııadaǵy energe­tı­kalyq áleýeti 1 GVt-qa deıin jetetin eń iri kampýsty qurý jónindegi «DО́O alqaby» jobasy búginde qarqyndy túrde júzege asyrylyp jatyr. Úkimet tıisti ınfraqurylymdyq jáne quqyqtyq jaǵdaılardy qam­tamasyz etip keledi. Atap aıt­qanda, jalpy aýdany 1,4 myń gektar jer telimi bólindi. Aýqymdy jobany júzege asyrý úshin qosalqy stansa satyp alý, sondaı-aq ınvestorlar men jobaǵa qatysýshylardy mem­le­kettik qoldaýdyń qosym­sha tetik­terin ázirleý jumysy júr­gizilip jatyr.

Qurylatyn ınfraqurylym­nyń mańyzdy elementi – halyq­aralyq seriktesterdi tartýǵa ar­nal­ǵan «Greenfield» aımaǵy bol­maq. Sondaı-aq odan ári keńeı­týge bolatyn 100 MVt-ǵa de­ıingi qýattar daıyndaldy. Infra­qurylym energııa tıimdi­liginiń koeffısıenti PUE 1.25 bolatyn «Tier» III halyqaralyq standartyna sáıkestendiriledi.

Telekommýnıkasııalyq ın­fra­qurylym salasyndaǵy eń «Iri hyperscale» jáne «BigTech» kompanııalarynyń talaptaryn qanaǵattandyrý maq­sa­tynda jelilik kidiris 80-nen 57 mıllısekýndqa deıin tómen­detiledi. Bul – negizgi eýropalyq trafık almasý ortalyqtarymen teń deńgeı.

Budan ári esepteý ınfra­qurylymyn kezeń-kezeńimen ulǵaıtý, árbiriniń 50 MVt qýaty bar JI-DО́O-nyń tórt kezeńin salý kózdelgen. Tutastaı alǵanda, «DО́O alqabyn» iske qosý elde sıfrlyq ınfraqurylym men esepteý qýattylyǵynyń óńirlik ortalyǵyn qalyptastyrýǵa, 30 mlrd dollarǵa deıin ınvestısııa tartýǵa, sondaı-aq 500-den astam joǵary bilikti jumys oryndaryn ashýǵa múmkindik beredi.

Jıyn qorytyndysynda salalyq mınıstrlikter men jaýapty uıymdarǵa jumys­tyń barlyq kezeńin ýaqtyly júzege asyrýdy qamtamasyz etý jáne qajetti normatıvtik sheshimderdi qabyldaýdy jedeldetý tapsyryldy.