Kenshiler astanasyndaǵy Nazarbaev zııatkerlik mektebiniń túlegi, «Altyn belgi» ıegeri Anar Sembekova amerıkalyq Qunnipiak University jáne aǵylshynnyń Hult International School of Business dep atalatyn joǵary oqý oryndarynan shaqyrtý alǵan edi. Alaıda daryndy jas ekiniń biri arman etetin mundaı múmkindikten bas tartyp, elimizdiń tanymal oqý ornyn tańdady.
Medısına salasyna tańdaýy túsken Anar Sembekova dárigerlik mamandyqty óz elimizde alǵan áldeqaıda durys dep esepteıdi.
– Sebebi, – deıdi ol, – ár eldegi jumystyń óz erekshelikteri bolady. Al Nazarbaev Ýnıversıtet – elimizdegi eń úzdik joǵary oqý oryndarynyń biri. Men atalǵan bilim ordasy bazasyndaǵy eki aptalyq lagerde bolǵanymda, ondaǵy jaǵdaıdy kórip qatty tańǵaldym. Zerthanalar, qural-jabdyqtar, oqytýshy-professorlar, bári-bári óte joǵary deńgeıde eken!
Bolashaq dáriger Anar Sembekova medısına salasynda daýasy joq dertter, beımálim qubylystar sııaqty áli de talaı aqtańdaq bar ekenin aıtady. «Ýnıversıtet qabyrǵasynda men osy jáne basqa da problemalar boıynsha zertteýlermen aınalysyp, elimizdegi densaýlyq saqtaý salasynyń damýyna ózindik úlesimdi qosqym keledi», deıdi.
Qaraǵandynyń patrıot qyzy Qazaqstanda oqyp, osy jerde jumys isteýdi aldyna maqsat etip qoıǵan. «Árıne, álemdi aralap, saıahattaǵan durys ta shyǵar. Tipti, shetelde biraz ýaqyt turýǵa da bolady. Biraq báribir de óz Otanyńa adal bolýyń kerek», deıdi aqyldy qyz Anar.
QARAǴANDY