Memleket basshysy Qasym-Jomart Toqaev Twitter paraqshasynda «Úkimet 5 shildeden bastap 14 kúnge karantın jarııalaý týraly (ol uzartylýy da múmkin) josparyn usyndy. Erteń Vedomstvoaralyq komıssııanyń otyrysynan keıin Densaýlyq saqtaý mınıstri túsinikteme beredi», dep jazǵan edi.
Tıisinshe, Premer-Mınıstr Asqar Mamınniń tóraǵalyǵymen Memlekettik komıssııanyń otyrysy da ótti. Bul otyrysta Qazaqstandaǵy epıdemııalyq ahýaldyń órshýin jáne koronavırýs ınfeksııasymen syrqattanýshylar sanynyń ósýin eskere otyryp, Memlekettik komıssııa bıylǵy 5 shildeden bastap shekteý sharalaryn engizý týraly sheshim qabyldady. Men bul qabyldanǵan sheshimdi óte oryndy dep baǵalap otyrmyn. Nege? Sebebi odan ózge jol qalmady. Osyndaı qadamǵa barýǵa májbúr bolyp otyrmyz.
Elimizde shekteý sharalary ýaqtyly qolǵa alynyp otyr. Mundaı sheshimniń qabyldanýyna bir jaǵynan otandastarymyzdyń da áseri boldy. Toı-tomalaq, bas qosýlardy shekteýdiń ornyna el arasynda qonaqqa barý men qydyrýlar kóbeıip barady. Aıtaıyn, sondaı basqosýǵa 1 adam dertke shaldyǵyp keletin bolsa, aınalasyndaǵy kemi 10 adamnyń vırýs juqtyrǵany emes pe? Osyny nege túsinbeımiz? Túsingeni bylaı tursyn, dúnıe júzin dúrliktirgen koronavırýs ınfeksııasy oıdan shyǵarylǵan, rasynda ol múldem joq deýshiler tabylyp jatyr. Estip-bilgenimdi aıtyp jatqan joqpyn, osyndaı pikirdi ustanǵan tanystarym kóptep kezdesedi.
Qudaı saqtanǵandy ǵana saqtaıdy. Barynsha saq bolǵanǵa ne jetsin? Artyq júris-turysty, kezdesý men júzdesýlerdi keıinge qaldyra turǵannan dúnıe búlinip qalmaıdy ǵoı. Esesine ózimiz, otbasymyz dertke shaldyǵyp, qaýipti indettiń quryǵyna ilinbeıtin edik. Qazaqstan halqy osyny uǵynsa deımin. «Koronavırýstyń saldarynan kóz jumypty» degen sýyq habardy kúnde estip jatyrmyz. Sodan sabaq alar emespiz. Bálkim, Memlekettik komıssııanyń otyrysynda qabyldanǵan shekteý sharalary otandastarymyzǵa oı salatyn shyǵar. Basty baılyǵymyz – densaýlyǵymyzǵa atústi qaramaıyq, aǵaıyn.
Aleksandr BARON,
Qazaqstannyń «Mısva» evreıler qaýymdastyǵy»
ZTB jetekshisi