Oblys ákimi Mahambet Dosmuhambetovtiń tapsyrmasymen tegin dári-dármekterdi Atyraý qalasy men jeti aýdannan 3000 otbasyǵa taratý kózdelipti. Dári-dármekterdiń quny 30 mln teńgeni quraıdy, - dep habarlaıdy Egemen.kz.
"Memleket azamattarymyzdy qoldaýdy bir sát te toqtatpaıdy. Bul aımaq basshysy Mahambet Dosmuhametovtiń bastamasymen jáne "Biz birgemiz" oblystyq qorymen birlesip júzege asyrylýda. Bir-birimizge kómek qolyn sozyp, osyndaı qıyn ýaqytta qoldaý kórsetý - bárimizdiń ortaq mindetimiz, patrıottyq paryzymyz. Biz buqaranyń áleýmettik az qamtylǵan 7 sanatyn dári-dármekpen qamtamasyz etýdi josparlap otyrmyz. Bul ıgi bastama aldaǵy ýaqytta da jalǵasyn tabady", - dedi oblys ákiminiń orynbasary Baqytgúl Hamenova.
"Jas Otan" jastar qanatynyń eriktileri men 50-ge avto-erikti 30 túrli dári-dármek salynǵan paketti áleýmettik az qamtylǵan otbasylardyń 7 sanatyna taratýdy bastady. Atap aıtqanda, asa muqtaj jandarǵa, kópbalaly jáne tabysy az otbasylar, birinshi toptaǵy múmkindigi shekteýli jandarǵa, erekshe balalary bar otbasylar, tómen zeınetaqy alatyn jáne áleýmettik az qamtylǵan topqa kiretin zeınetkerler, jetim balalar, tyl eńbekkerleri men Ekinshi dúnıejúzilik soǵysqa qatysqandar men olarǵa teńestirilgender qamtylady.
"Volonterlar dári-dármekterdi jetkizýdi bir kún buryn bastady. Ár jıyntyqta maska, dene qyzýyn túsiretin, sondaı-aq, jóteldi basatyn dári-dármekter bar", - dedi eriktiler shtabynyń jetekshisi Áıgerim Járdemqyzy.