Qazirgi kezde Jambyl oblysynda karantındik sharalardyń saqtalýyn baqylaý jumystary kúsheıtilýde. Quramynda ákimdik, polısııa, sanıtarlyq qyzmet jáne buqaralyq aqparat quraldarynyń ókilderi bar mobıldi toptar kún saıyn óńirdegi kóńil kóterý oryndaryna reıdtik jumystar júrgizýde. Nátıjesinde kún saıyn karantın rejımin buzýshylar anyqtalýda, - dep habarlaıdy Egemen.kz.
Jalpy, karantın talaptaryn buzý jaǵdaıy Taraz qalasynda jıi kezdesýde. Máselen, jýyrda ǵana kóne shahardaǵy qonaqúılerdiń birinde karantın talaptarynyń buzylýy anyqtalǵan. Bul jerde bir top adam spırttik ishimdik iship, basseınge túsip demalǵan.
Osyndaı jaǵdaı oblys ortalyǵyndaǵy meıramhanalardyń birinde de oryn alǵan. Alaıda, atalǵan mekeme basshylyǵy mobıldi topty kóre sala, 40-qa jýyq kelýshini úsh VIP-bólmege jasyrýǵa tyrysqan. Sóıtip, kerisinshe olardyń aýrý juqtyrý qaýpin joǵarylatqan. Jambyl oblysy ákimdiginiń málimetinshe, tekserýshiler esikterdi ashý úshin qutqarýshylardyń kómegine júgingen.
Osyndaı zańbuzýshylyqtar Taraz qalasyndaǵy basqa oıyn-saýyq oryndarynda da kezdesken. Reıd nátıjesinde bir túnde shamamen 2 mıllıon teńge aıyppul salynyp, hattamalar toltyrylǵan. Sondaı-aq, mobıldi toptar karantın kezinde qoǵamdyq tamaqtaný nysandarynyń sanıtarlyq-epıdemıologııalyq talaptary men jumys jaǵdaılaryn belsendi túrde túsindirýde. Degenmen, Jambyl oblysynyń bas memlekettik sanıtarlyq dárigeri Ǵazız Nadýev azamattar bul reıdterdiń negizgi maqsaty aıyppul salý emes ekenin túsinýi kerektigin aıtady.
"Qazirgi epıdemıologııalyq jaǵdaı halyqtyń karantın sharalaryn barynsha ustanýǵa mindetti ekendigin kórsetýde. Kún saıyn kóptegen adamdar koronavırýstyń qurbanyna aınalýda. Olardyń ishinde ózimizdiń týystarymyz, dostarymyz ben tanystarymyz da bolýy múmkin. Ár adam óz áreketi úshin jaýap berýi kerek. О́zimizdi saqtap, aınalamyzǵa qaýip tóndirmeýimiz kerek. Biz olar úshin jaýapkershilik sezinýimiz tıis", - deıdi ol.
Jambyl oblysy