Álem jurtyn úreı men úmittiń arnasyna toǵystyrǵan indettiń izi óshti deýge áli erte. Degenmen elimizdegi epıdemııalyq jaǵdaı birshama turaqtalý deńgeıine shyqqanyn atap ótken jón. Kórinbeıtin dushpanmen júrip jatqan kúrdeli kúreste kúni-túni kóz ilmeı, eleýli erlik kórsetken aq halatty jandardyń eńbegi eren. Sonymen qatar karantın talaptaryn qatań ustanyp, syrtqa shyǵyp, syrqat kóbeıtpeı, syn saǵatta sabyrlyq tanytyp, oshaǵynda otyrǵan otandastarymyzdyń da orny bólek. Jurt bolyp jumylsaq, juqpaly derttiń de álegi basylǵaly tur.
Elimizde Tótenshe jaǵdaı rejiminiń toqtaǵany qaýipti indet joıylǵandaı qabyldanyp, barlyq jerde qannen qapersiz qalypty tirshilik qaıta jandandy. Sonyń saldarynan indet keń etek alyp, azamattardyń amandyǵyna úlken zardabyn tıgize bastady. Vırýs meńdep, talaı jaqynymyzdan kóz jazyp qaldyq. Aınalamyzda bul báleketke ushyramaǵan aǵaıyn kemde-kem. Ahýaldyń bulaı ýshyǵýy basqa da máselelerdi kóbeıtip jiberdi. Aýrýhanalarda oryn jetpeı, dárigerler úlgermeı, jedel járdem ýaqytynda kómek bere almaı halyq ábden ábiger boldy. Bul azdaı dárihanalar aldynda dúrbeleń týyp, shaǵymdanǵan jurttyń qarasy kóbeıdi. Izdegen dári-dármek tabylmaı, tabylsa da quny qalta kótermeı biraz qınady. Jyǵylǵanǵa judyryq bolyp, alypsatarlar da dári-dármek tapshylyǵyn týdyryp, baǵany tym sharyqtatyp jiberdi.
Osylaısha indettiń órshýimen qanshama másele ýshyǵyp ketti. Bul jaǵdaıdyń ońalýyna Prezıdent bas-kóz bolyp, Úkimetke qatań tapsyrma júktedi. Jaǵdaıdy baqylaýdan shyǵaryp alǵan ákim-qaralar sógis aldy. Sodan keıin joǵaryda atalǵan máselelerdi retteý úshin biraz sharýa qolǵa alyndy. Nátıjesinde ahýal birshama turaqtanǵan syńaıly. Bul jóninde Úkimettiń selektorlyq otyrysynda málim boldy.
Jıynda Qazaqstanda epıdemııalyq jaǵdaıdyń turaqtalý deńgeıine shyqqany atalyp ótti. Respýblıka boıynsha koronavırýs juqtyrǵandardyń ósimi 2,1%-dy quraıdy. Eń tómengi ósim táýligine Shymkentte – 1%, Qyzylorda oblysynda – 0,9%, Túrkistan oblysynda – 0,8%, Aqtóbe oblysynda 0,5% tirkelip otyr.
Jalpy tósektik oryn qory 30,4 myńnan 49,7 myń tósektik orynǵa deıin ulǵaıtyldy. Provızorlyq tósektik orynnyń bos bolmaýy 20%-ǵa (89%-dan 69%-ǵa deıin) jáne reanımasııalyq tósektik orynnyń bos bolmaýy 6%-ǵa (73%-dan 67%-ǵa deıin) azaıdy. Covid-ten saýyǵyp ketkenderdiń sany 60%-ǵa kóbeıdi, jedel járdemdi shaqyrýlar 23%-ǵa tómendedi.
Indetke baılanysty ahýaldyń qalypqa kele bastaýy týraly Densaýlyq saqtaý mınıstri Alekseı Soı Ortalyq kommýnıkasııalar qyzmeti alańynda da aıtyp berdi. Sonyń biri koronavırýs ınfeksııasyna qarsy vaksınanyń qashan qoldanyla bastaıtyny jóninde boldy.
«Qazaqstan qazirgi ýaqytta ártúrli memleketterdiń vaksınasyn zerttep jatyr. Buǵan deıin aıtylǵandaı álem elderiniń vaksınalary ártúrli klınıkalyq zertteýlerden ótedi. Reseılik vaksınaǵa qatysty aıtar bolsaq, áriptesterimizben seriktese jumys júrgizip jatyrmyz. Vaksına klınıkalyq zertteýlerdiń bárinen ótip, jappaı el ishinde qoldanyla bastaǵany týraly resmı málimdeme jasalǵannan keıin ǵana ony elge ákele bastaımyz», dedi A.Soı.
Onyń aıtýynsha, Qazaqstanǵa eń birinshi kezekte vaksınalar boıynsha zertteýdiń naqty nátıjeleri kerek. Mınıstr vaksınanyń tıimdiligi rastalǵan jaǵdaıda reseılik áriptestermen Qazaqstanǵa aldyńǵy kezekte jetkizý máselesi kelisilgenin jetkizdi.
«Vaksına shyǵarýshy basqa memlekettermen de kelisimge kelip otyrmyz. Onyń ishinde Qytaıda jasalatyn vaksınalar bar. Qytaılyq mamandar BAÁ-men birge klınıkalyq synaqtar ótkizýde. Basqa da vaksınalar qazir klınıkalyq deńgeıde zerttelip, synaq jumystary aıaqtalýǵa jaqyn qaldy. Jalpy, bárimen baılanystamyz. Nátıje shyǵatyn naqty ýaqytty kútip otyrmyz. Álemdik qaýymdastyq bul týraly mindetti túrde habarlaıdy. Osydan keıin ǵana eń birinshi kezekte qandaı vaksınany alatynymyz týraly naqty sheshim qabyldanady», dedi mınıstr.
Sondaı-aq ol elimizde shekteý sharalary alynyp tastalǵan kezde koronavırýs ınfeksııasy eshqaıda joǵalyp ketpegenin esten shyǵarmaý kerek ekenin aıtty.
«Biz oǵan úırenip, kúresip, ómir súrýimiz kerek. О́mir jalǵasady. Ár adam aýa raıyna beıimdeledi. Jańbyr jaýsa, biz qolshatyr alyp, ózimizdi sýdan qorǵaımyz. Kún sýysa jyly kıim kıemiz. Mundaıda tipti oılanbaımyz, bári qalypty jaǵdaı. Qandaı shara bolsyn bári qashyqtan ótýi kerek. Eger ınfeksııa bolsa, qandaı da bir epıdemııalyq kezeń bastalsa nemese aýa arqyly ınfeksııa tarasa, maska taǵý, jaqyndaryńyzdy qorǵaý, áleýmettik qashyqtyqty saqtaý qalypty jaǵdaıǵa aınalýy kerek. Eger qandaı da bir shara bolsa, adamdar bir-birinen alshaqtap, alystap otyrýy kerek. Qazir ınfeksııa qatty órship ketedi dep kútpesek te, bul bizdiń qalypty ómirimizge aınalýy tıis», dedi A.Soı.