France Football basylymy pandemııaǵa baılanysty dástúrge aınalǵan «Altyn dop» syılyǵyn tapsyrý rásimin bıyl ótkizbeıtinin málimdedi.
1956 jyldan beri jyldyń eń úzdik fýtbolshysyna beriletin «Altyn dop» júldesi alǵashynda Eýropa klýbtarynda oınaıtyn káriqurlyq ókilderine ǵana beriletin. Sondyqtan bul syılyq Maradona jáne Pele sııaqty taǵy basqa fýtbolshylarǵa buıyrmady. Tek 1995 jyly ǵana ereje ózgerip, Eýropa klýbtarynda oınaıtyn kez kelgen eldiń fýtbolshysyna beriletin boldy. Al 2007 jyldan búginge deıingi ereje boıynsha endi «Altyn dopty» álemniń kez kelgen komandasynda óner kórsetetin fýtbolshy ultyna qaramaı ala beredi.
France Football basylymynyń «Altyn dobyn» eń kóp jeńip alǵan fýtbolshylardyń qatarynda Iohan Kroıff (Nıderland, 1971, 1973, 1974), Mıshel Platını (Fransııa, 1983, 1984, 1985), Marko van Basten (Nıderland, 1988, 1989, 1992) jáne Krıshtıaný Ronaldý (Portýgalııa, 2008, 2016, 2017) bar. Argentına quramasynyń shabýylshysy Lıonel Messıdiń qorjynynda eki júlde bar (2009, 2019). Aıta ketý kerek, France Football 2010-2015 jyldar aralyǵynda FIFA-men birlese tapsyrǵan «Altyn dop» boıynsha statıstıka bólek esepteledi.