Men osydan biraz jyl buryn eldigimizdiń ótkeni men keleshegin tebirene tolǵaǵan «Tý» atty poemamda:
«Qashanda qııanattan qazaq ólgen,
Jaýyzdyń eshbiri joq jaza kórgen.
Kók týdyń qasıetti kıesi atar,
Sabynan ustamasań taza qolmen», – degen edim.
Sol sózdi qazir de qaıtalaǵym kelip otyr. El basyna oılamaǵan jerden aýyr kún týdy. Qara tutyp otyrmyz... Qazaq ótken tarıhynda qııan-keski qııanattan qyrylsa, endi qulaq estip, kóz kórmegen kesapat indetten zardap tartyp otyr. Qanshama azamatymyzdan aıyryldyq, qanatymyzdan qaıyryldyq. Kózimizde qandy jas, kókiregimizde ashy zapyran. Halyq yzaly da azaly. Osyndaıda el erge qarasa, er jerge qarasa ne bolmaq? Qasiret tartyp shýlaǵan qalyń buqarany aýyr indettiń azabynan, tosyn kelgen ajalynan kim arashalap qalmaq? Kól qorǵaǵan qyzǵyshtaı el úshin aldymen kim shyryldap otqa túspek? Árıne zobalań indet ákelgen zulmat salmaq eń aldymen el tizginin ustap otyrǵan azamat Prezıdenttiń ıyǵyna túspek. Alaıda jalǵyz Prezıdent ne isteı alady? Mundaı qıyn-qystaý kezeńde júregi elim dep soqqan azamattyń bári aýyr júkti jumyla kóterip Prezıdenttiń qasynan tabylýymyz kerek.
Qazaq «Birlik bolmaı, tirlik bolmaıdy» – dep osyndaıda aıtqan. Qasym-Jomart Kemeluly el tizginin ustaǵannan beri jyldan asa ýaqyt boldy. Biraq bir jylda on jylǵa tatıtyndaı qıyn kúnderdi bastan ótkerdik. Ol oqıǵanyń bári elge málim. Osy tar kezeń, taıǵaq keshý sátterde Prezıdentimiz Qasym-Jomart Kemelulynyń qajyrly qaıratyna, qasiretke qaıyspaı qarsy turyp, belin bekem býyp, aq júreginen aqtarylyp shyndyqty aıtqan adaldyǵyna, kóńiliniń de, qolynyń da tazalyǵyna kózim jetti. Atadan asyl týǵan, tekti ákeden tálim alǵan Qasym-Jomart Kemelulyndaı arly azamat qana el Týyn taza qolmen ustaı alady.
Jasyratyny joq, qazir bizdiń elde koronavırýsten de qaterli indet bar. Ol – korrýpsııa. Jemqorlyqtyń asqynǵany sonsha, halyq qyrylyp jatqanda dári-dármekti innen-inge, kórden-kórge tyqqan, óz halqyna jany ashymaıtyn, búıregi búlk etpeıtin betsizderdiń qylyǵy halyqqa indetten de qatty soqqy boldy. Prezıdentimiz Qasym-Jomart Kemelulynyń osy jemqorlarǵa qarsy birden ashyq kúres bastaǵany kóptiń kóńilinen shyqty. Joly taza, qoly taza adam ǵana osyndaı batyl qadamǵa bara alady. Alla buıyrsa, halqymyz qaırat kórsete bilse, Prezıdentimizdiń bul qaıǵyly kezeńnen de elimizdi alyp shyǵaryna senimdimin. Oǵan 10 shildedegi aıtqan óz sózi de dálel.
Sózimniń basyndaǵy óleńimde aıtqanymdaı, Prezıdenttiń ózinen bastap, bılik basyndaǵy ár azamat kók Týdyń sabynan taza qolmen ustaı bilse ǵana, el betine túzý qaraı alady. Alaıda ashy shyndyqty aıtsaq, eshkimniń biteý jarasynyń aýyzy ashylmas. Osynaý zulmat kezeńde el Úkimeti Prezıdentke súıeý, halyqqa tireý bolýǵa tıis. Amal ne, qatelikterge jol berilip, el qıyndyqtarmen betpe-bet keldi. Halyq ta soǵan kúıinýde.
El bolashaǵy jarqyn bolsyn desek, Prezıdent qasyna ult úshin aıanbaı qyzmet etetin, memleket múddesin óz múddesinen joǵary qoıatyn, júzden júırik, myńnan tulpar shyǵatyn tulǵalardy ǵana toptastyrý kerek dep oılaımyn. Bizge mynaý qıyn zamanda halyqtyń qamynan góri, qaltanyń qamyn oılaıtyndardyń bılik basynda otyrýy asa qaterli. Sondyqtan da halyqty qyzǵyshtaı qorǵaıyq, dosqa kúlki, dushpanǵa taba bolmaıyq!..
Nesipbek AITULY,
Memlekettik syılyqtyń laýreaty