Esterińizde bolsa, 2020 jyldyń 4 tamyz kúni jergilikti ýaqyt boıynsha saǵat 18:00 shamasynda Beırýttaǵy teńiz portynyń bazasynda joıqyn jarylys boldy. Jarylys saldarynan jaqyn jáne birneshe shaqyrym jerde ornalasqan ǵımarattar qırap, kóbi búlingen. Olardyń arasynda Qazaqstan elshiliginiń ǵımaraty da bar. Osy oqıǵa kesirinen 5 myńnan astam turǵyn jaraqattanǵan. Sońǵy derekterge sensek, jarylystan 137 adam kóz jumdy.
Oqıǵa ornynan túsirilgen vıdeolar eki kúnnen beri ınternet qoldanýshylaryn dúrliktirdi. Ásirese, jarylys bolardan birneshe mınýt buryn ǵana nekelesip, otbasylyq vıdeoǵa túsip jatqan qalyńdyqtyń beınejazbasy keń taraldy. Aq kóılek kıgen kóńildi arý kamera aldynda qylyqty qalpynda turǵan edi. Júzindegi kúlkiden tynyshtyqtyń, sheksiz baqyttyń taby baıqalady. Kenet gúrs etken dybys estildi. Abdyrap qalǵan qalyńdyq basyn kótergeni sol-aq edi, joıqyn soqqy aınalanyń apyr-topyryn shyǵardy. Jas-jubaılar buqpantaılap, jaqyn jerdegi qonaq úıge qaraı júgiredi. Mine, osy bir kórinis operatordyń kamerasynda saqtalyp qalǵan eken.