Respýblıka boıynsha memlekettik bilim berý granttarynyń qorytyndysy jarııalandy. Bıylǵy oqý jylyna 53 myńǵa jýyq granttar bólindi. Onyń ishinde Syr eliniń talapkerleri de memleket esebinen usynylatyn tegin bilim alý múmkindigine ıe boldy. Bıylǵy jyly óńirde 3948 oqýshy memlekettik grantqa ótinish bergen. Onyń 3058-i grant ıegerleri atandy. Bul týraly Egemen.kz oblys ákimdiginiń baspasóz qyzmetine silteme jasap habarlaıdy.
Granttardyń bólinisi negizinen birneshe basym baǵyttarǵa qaraı taǵaıyndaldy. Atap aıtqanda, aqparattyq tehnologııalar, pedagogıka salasy men qurylys salasynyń mamandaryna basym granttardy aldy. Qyzylorda oblysynan grantqa úmitker bolǵan 3058 oqýshynyń basym bóligi tehnıkalyq mamandyqtardy tańdaǵan. Tarqatyp aıtqanda, 980 talapker pedagogıkalyq, 356 túlek medısınalyq baǵytty tańdasa, 912 úmitker tehnıkalyq mamandyqtarǵa tańdaý jasaǵan. Al, 212 túlek aýyl sharýashylyǵy baǵytyna barýdy kózdeıdi. Sonymen birge 598 túlek ózge de baǵyttaǵy mamandyq ıesi bolýdy qalady.
Bıyl jyldyń basty ereksheligi – granttar ýnıversıtetterge emes, talapkerlerge beriledi. Iаǵnı talapkerdiń granty negizinde ýnıversıtetter bala qabyldaıdy. Bul rette granttardyń bóliný baǵyty eńbek naryǵyndaǵy suranysqa saı júrgizilgen.
Aıta keteıik, memlekettik bilim berý grantynan bólek, Qyzylorda oblysy ákiminiń arnaıy 150 granty bólindi. Ákim atyndaǵy grant arnaıy kategorııadaǵy otbasynan shyqqan, oqý úlgerimi jaqsy talapkerlerge beriledi.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.