Reseı Federasııasy Máskeý mańyndaǵy Alabıno polıgonynda 16 eldiń komandalary ókilderiniń qatysýymen "Tank bıatlony" jeke jarysynyń jerebesi ótti. Bul týraly Egemen.kz Qorǵanys mınıstrliginiń baspasóz qyzmetine silteme jasap habarlaıdy.
Qazaqstandyq komanda sary tústi tankterde óner kórsetip, alǵashqy kezdesýin 25 tamyzda Qyrǵyzstan, Reseı jáne О́zbekstannan kelgen tank mamandarymen bir topta jeke jarystan bastaıdy.
Qazaqstan Qarýly Kúshteriniń komandasyna halyqaralyq baıqaýǵa irikteý kezeńderiniń kóshbasshylary – tankıst mamandar irikteldi. Aldyn ala kezeńder barysynda «Ońtústik», «Shyǵys», «Batys» óńirlik qolbasshylyqtarynyń jáne Desanttyq-shabýyldaý áskerleriniń atynan tórt tank mamandarynyń ekıpajy irikteldi. Elimiz atynan synǵa túsetin komandany QR QK Bas shtaby bastyǵynyń orynbasary general-maıor Ádilbek Aldabergenov basqarady.
2020 jylǵy Armııa halyqaralyq oıyndary aıasynda «Tank bıatlony» baıqaýy «Alabıno» polıgonynda 23 tamyz ben 5 qyrkúıek aralyǵynda ótedi. Atalmysh oıyn 2013 jyldan beri ótkizilip keledi. Qatysýshy elderdiń sany da jyl saıyn artýda. Bıyl «Tank bıatlonyna» 16 eldiń komandalary qatysady. Sarapshylar atap ótkendeı, baıqaýda eń myqtylary Belarýs, Qazaqstan, Qytaı jáne Reseı qatysýshylary bolyp tabylady.
«Tank bıatlony» - bıyl qazaqstandyq komanda qatysatyn jalǵyz baıqaý. Bul jalpy komandalyq júldeli oryndardy jeńip alý múmkindigin aıtarlyqtaı tómendetedi. О́ıtkeni, kóptegen baıqaýlarda joǵarǵy upaı jınaǵan komanda jeńiske jetedi. Soǵan qaramastan, qazaqstandyq jaýyngerlerdiń jeńis tuǵyrynan kórinýge úmitti.
«Tank bıatlony» tankti basqarý, kedergilerden ótý jáne zeńbirek pen pýlemetten nysana kózdeý oty joǵary sheberlikti ǵana emes, sonymen qatar úılesimdilikti, ekıpaj músheleriniń is-qımylyn úılestirýdi, jaqsy dene daıyndyǵyn talap etedi.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.