Bıylǵy Ádebıet salasy boıynsha halyqaralyq Býker syılyǵy nıderlandyq jazýshy Marıka Lýkas Reıneveldke buıyrdy. "Jaısyz kesh" (The Discomfort of Evening) romany úshin syılyqqa laıyq dep tanylǵan avtor bedeldi marapat tarıhyndaǵy eń jas laýreat atandy. Aıta keteıik, bul 29 jastaǵy Reıneveldtiń debıýttik shyǵarmasy.
Marapattaý rásimi karantındik rejimge baılanysty Londonda onlaın túrde ótip, laýreat esimin qazylar alqasynyń tóraǵasy Ted Hodjkınson tikeleı efırde jarııalady. Álemdik bestseller qataryna engen roman Nıderlandyda 55 myń tırajben basylyp, keıin fransýz, ıspan, koreı, qytaı, arab jáne aǵylshyn tilderine aýdarylǵan. Debıýttik shyǵarmasyna alty jyl ýaqyt jumsaǵan avtor aýyr jaǵdaıǵa tap bolǵan fermer otbasyn sýretteıdi.
Syılyqtyń reglamentine saı Reıneveldke 50 myń fýnt sterlıng (65 myń dollar) syıaqy beriledi. Jáne bul qarjyny shyǵarmany aǵylshyn tilinde oqyrmanǵa usynǵan Mıshel Hatchısonmen bólisýi shart. Aıta keteıik, Býker syılyǵyn tabystaýshylar romandy aǵylshynsha sóıletken aýdarmashynyń súbeli eńbegin erekshe atap ótken edi.
Eske salsaq, Býker syılyǵynyń qysqa short-paraǵynda nıderlandyq Reıneveldten bólek bes úmitkerdiń, ıaǵnı Argentına, Germanııa, Iran, Meksıka jáne Japonııa avtorlary básekege túsken bolatyn.
Halyqaralyq Býker syılyǵy 2004-2016 jyldar aralyǵynda eki jylda bir ret berilse, qazir jyl saıyn tabystalyp keledi. 2019 jylǵy syılyqty kanadalyq Margaret Etvýd pen brıtandyq Bernardın Evarısto alǵan edi.