Búginde memleket tarapynan qarjylaı qoldaý kórip, sharýasyn dóńgeletip otyrǵan jas kásipkerler qatary artyp keledi. Mine, osyndaı jas kásipkerlerdiń qatarynda Qarmaqshy aýdandyq probasııa esebinde turatyn azamattar da bar.
«Atameken» ulttyq kásipkerler palatasynyń «Bastaý Bıznes» jobasy boıynsha bir aılyq «kásipkerlik negizderi» kýrsyn aıaqtap, sertıfıkat alǵan probasııa esebindegi úsh azamat, jańadan bastaǵan kásipti qoldaý maqsatyndaǵy Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan memlekettik baǵdarlamasy aıasynda 555 600 teńge qaıtarymsyz grant utyp aldy. Úsheýi de jeke kásibin ashty. Bireýi taýyq ósirýmen aınalysyp jatsa, qalǵan ekeýi mal basyn kóbeıtip, jeke kásibin dóńgeletip otyr.
«Taýyq ósirý arqyly óz jaǵdaıyńdy túzep alýǵa da bolady eken. Taýyqty kútip baptaý da ońaı emes. Olardyń qorada erkin qozǵalýyna jaǵdaı jasaý qajet. Qazir áleýmettik jeli degen jaqsy boldy, qusty kútip-baptaýdyń túrli ádisin ǵalamtordan oqımyn. Taýyq ta qunarly azyq-túlik túrlerin qajet etedi. Bolashaqta taýyqty kóbeıtip, seh ashyp, isimdi odan ári damytqym keledi», deıdi probasııa esebindegi azamat.
Al aýdandyq probasııa qyzmetiniń aǵa ınspektory, ádilet maıory Jaqsybek Júnisovtiń aıtýynsha, probasııa esebindegi taǵy 2 azamat mal ósirip, mal basyn kóbeıtýmen aınalysyp jatyr. Memleketten alǵan kómegine mal ustaıtyn qora salyp, mal satyp alǵan. Bir azamat bir aılyq kýrsty aıaqtap, sertıfıkat alǵan. Qazirgi ol memleket tarapynan beriletin kómekti alý úshin qujattaryn daıyndap júr.
Dana DOSTANOVA,
Qyzylorda oblysy boıynsha QAJD qyzmetkeri