IT senimi ónimder tizilimine kıberqaýipterden qorǵaýǵa, uıymdardyń qyzmetin avtomattandyrýǵa, elektrondy qujattarmen jumys isteýge, bilim berý prosesin basqarýǵa, aqparatty qorǵaýǵa arnalǵan jáne t.b. baǵdarlamalyq sheshimder engizildi.
Elektrondyq ónerkásip pen baǵdarlamalyq qamtylymnyń senim bildirilgen óniminiń tizilimine búginde 39 otandyq ónim engizilgen bolsa, 12 óndirýshiniń 18 ónimin Sıfrlyq damý, ınnovasııalar jáne aeroǵarysh ónerkásibi mınıstrligi atalǵan tizilimge osy jyldyń basynan beri engizgen.
«Tizilim Qazaqstannyń AKT naryǵyndaǵy otandyq IT-ónimderdiń úlesin arttyrýdy jáne AQ talaptaryna sáıkes keletin baǵdarlamalardy qoldaný arqyly memlekettik organdardyń aqparattyq qaýipsizdigin qamtamasyz etýdi kózdeıdi», deıdi Sıfrlyq damý, ınnovasııalar jáne aeroǵarysh ónerkásibi birinshi vıse-mınıstri, mınıstrdiń mindetin atqarýshy Baǵdat Mýsın.
О́z ónimin atalǵan tizilimge engizgen óndirýshiler memlekettik satyp alýǵa biliktilikti aldyn ala irikteý tásilimen qatysý quqyǵyna ıe bolady. Tizilim memlekettik organdar men bıýdjettik uıymdardyń aqparattyq qaýipsizdigin qamtamasyz etýdi kózdeıdi. Sondaı-aq bul bastamany kvazımemlekettik sektorda qoldanýdy pysyqtaý josparda bar.
2019 jyly memlekettik satyp alý týraly zańnamaǵa engizilgen túzetýlerge sáıkes 2020 jylǵy 1 qańtardan bastap tizilimge engizilgen elektrondyq ónerkásip jáne baǵdarlamalyq qamtamasyz etý ónimderi basymdyqqa ıe tártippen satyp alynatynyn aıtyp ótken jón.
Kompanııalarǵa óz ónimderin tizilimge engizý úshin eń aldymen mınıstrlikke «Elektrondyq ónerkásip pen baǵdarlamalyq qamtylymnyń senim bildirilgen óniminiń tizilimine» engizý týraly ótinim berýi jáne 2018 jylǵy 28 naýryzda bekitilgen tizilimdi qalyptastyrý jáne júrgizý qaǵıdalarynyń talaptaryna sáıkes tıisti qujattardy qosa joldaýy kerek.