Olardyń 40 paıyzy, ıaǵnı 20 844 oqýshy ata-anasynyń ótinishimen kezekshi toptarda bilim ala bastady. Bilim uıalarynda barlyq sanıtarlyq talaptar qatań saqtalǵan. Shtattyq rejımde jumys isteýge kirisken mektepterdiń daıyndyǵy tolyqtaı tekserýden ótken.
Adamı áleýetti damytý basqarmasynyń málimetinshe, josparǵa saı oblysta 912 mektep óz jumysyna kirisken. Onyń ishinde 164 mektep shtattyq rejımde jumys istep, 16 375 oqýshyǵa bilim berýde. Byltyrǵy oqý jylyn 910 mektep aıaqtaǵan bolsa, bıyl Ordabasy aýdanynan 600 oryndyq mektep jáne Jetisaı aýdanynan 200 oryndyq mektep iske qosyldy. Jalpy, óńirdegi mektepterde bala sany — 499 535. Aýdandarǵa tıisti 4000 dana planshet «Bilim» tarıftegi sımkartasymen birge qujattary rásimdelip, eń aldymen áleýmettik osal toptaǵy, kópbalaly jáne az qamtamasyz etilgen otbasy oqýshylaryna beriletin bolady.