Atyraýda turatyndardyń bári birdeı shekesi shylqyǵan baı-qýatty emes. Ásirese shaǵyn aýyldardy meken etken otbasylardyń arasynda turmystyq jaǵdaıy tómenderi de bar. Máselen, Maqat aýdanyndaǵy Eskene eldi mekeni de turǵyndary jan-jaqqa qonys aýdarǵan shaǵyn aýyldardyń qataryna kiredi. Endi munda 13 otbasynyń mektep jasyndaǵy 22 balasy qashyqtan oqýda qıyndyqqa ushyrap otyr.
О́ıtkeni osy kezge deıin Eskenege ınternet jelisi tartylmaǵan. Sol sebepten, mektep oqýshylary shatyrǵa shyǵyp, ınternet jelisin izdeýge májbúr. Bilim nárimen sýsyndaǵysy kelgen shákirtterdiń satymen shatyrǵa shyǵyp-túsip júrgen sáti áleýmettik jelilerde de, BAQ betinde de jarııalanyp jatyr. Shynymen solaı ma? Mundaı shaǵyn aýyldarda turatyn oqýshylar ınternetpen nege qamtylmaǵan?
Osyndaı saýaldarǵa jaýap alý úshin Maqat aýdanynyń ákimi Shákir Keıkınge habarlasqan edik. Ákimniń málimetine súıensek, «Qazaqtelekom» AQ óńirlik fılıalynyń basshylary 20 tamyzǵa deıin Eskenedegi úılerdi ınternet jelisimen qamtýdy Beeline jáne Kcell mobıldi baılanys operatorlary arqyly sheshýge ýáde bergen eken. Alaıda atalǵan mobıldi baılanys operatorlarynyń qyzmet kórsetýi qarjyǵa tirelgendikten, «Qazaqtelekom» AQ óńirlik fılıalynyń basshylary bul máseleniń sheshilmeıtinin eskertipti.
– Týyndaǵan máseleni oń sheshý úshin «Transtelekom» mekemesiniń basshylaryna ótinish bildirdim. «Transtelekom» mekemesi tarapynan Eskene eldi mekeninde temir jol torabynyń bir betindegi 11 úıdiń toǵyzyna optıkalyq talshyq jelisi júrgizildi. Endi bul mekeme qajetti materıaldardyń bolmaýyna baılanysty qalǵan úılerdi aldaǵy qazan aıynda ınternetpen tolyq qamtýdy josparlap otyr, – deıdi aýdan ákimi.
Sh.Keıkınniń aıtýyna qaraǵanda, temir jol torabynyń kelesi betinde 14 otbasy turady. Olardyń mektep jasyndaǵy 19 balasy da keńjolaqty ınternet jelisiniń ıgiligin kórmeı otyr. Biraq Activ mobıldi baılanys operatorynyń qyzmetin paıdalanady.
– Buryn Eskene eldi mekenindegi 22 bala, Taskesken eldi mekeninen 6 bala, №441 bekette turatyn 2 bala Dossor kentindegi S.Sháripov atyndaǵy mektep-ınternatta oqydy. Oqýshylarǵa atalǵan mektep-ınternatta 2020-2021 jylǵy oqý prosesin júrgizýge daıynbyz. Osyǵan oraı ózim, orynbasarym, okrýg ákimi, aýdandyq bilim berý bóliminiń basshysy, S.Sháripov atyndaǵy mektep-ınternattyń dırektorymen birge Eskene eldi mekenindegi ata-analarmen kezdesý ótkizdik. Ata-analardan mektep jasyndaǵy balalaryn mektep-ınternatta jatyp oqýǵa jiberýin suradym. Mektep-ınternatta jatyn orny da, tamaǵy da, ınternet jelisi de daıyn, – deıdi Sh.Keıkın.
Alaıda turǵyndar balalaryn Dossor kentindegi mektep-ınternatta jatyp oqýǵa jiberýge kelispeı otyr. Osyǵan oraı ata-analar ózderiniń qarsylyǵyn qaǵazǵa túsirip, qolyn qoıyp beripti. Endi olar balalaryn qashyqtan oqytý úshin ınternet jelisin ornatý múmkindigi qarastyrylǵanyn qalaıdy.
– Balalar – bizdiń bolashaǵymyz. Olardyń qandaı jaǵdaıda da sapaly bilim alýyna kómegimizdi beremiz. Sol sebepten, atalǵan aýyldarǵa ınternet jelisin tartý jumystaryn jedeldetýdi qolǵa alamyz, – deıdi aýdan basshysy.
Elimizde sıfrlandyrý jobasy qolǵa alynyp, barsha jurt ınternettiń ıgiligin kórip otyrǵanda, shaǵyn aýyldardaǵy shákirtterdiń umyt qalǵany, olardyń shatyrǵa shyǵýǵa májbúr bolǵany ókinishti-aq. Buǵan deıin oblys ákimi Mahambet Dosmuhambetovtiń málim etkenindeı, mobıldi baılanys operatorlary arqyly satyp alynatyn 3 myń roýter qaıda eken? Al ata-analar balalarynyń shatyrǵa shyǵýyna nege ruqsat bergen?
Atyraý oblysy,
Maqat aýdany