Almaty ákimi Baqytjan Saǵyntaev Túrksib aýdanynyń jańa yqshamaýdandarynda salynyp jatqan sýmen qamtý jáne sýdy burý jelileriniń, joldardyń, kóshe jaryǵy qurylystarynyń qarqynyn tekserdi, dep habarlaıdy Egemen.kz
Almaty ákimi B. Saǵyntaev Instagram-daǵy paraqshasynda megapolıstiń aýdandaryna jasaǵan jumys sapary týraly únemi aıtyp keledi. Munda qala ákimi joldardyń, ınjenerlik ınfraqurylymdardyń qurylystaryna, aýmaqtardyń abattandyrylýyna jáne turǵyndardyń áleýmettik ótinimderiniń sheshilýine aıryqsha nazar aýdarady.
"Qalaǵa qosylǵan yqshamaýdandar turǵyndary birneshe jyldan beri kommýnaldyq-turmystyq jaǵdaıdyń jaqsarýyn kútýmen keledi. Qala turǵyndarynyń ótinishterin eskerip, ótken jyly shet aımaqtardy damytýǵa baǵyttalǵan "Jańa Almaty" keshendi josparyn ázirledik", dep jazdy B.Saǵyntaev.
Keshendi jospardaǵy mindetterdiń qalaı iske asyp jatqanymen qala ákimi Túrksib aýdanyna jasaǵan jumys sapary barysynda tanysty. Munda birden úsh yqshamaýdandarda – Qaırat, Álmerek pen Nurshashqanda jyl sońyna deıin 150 shaqyrymnan astam sýmen qamtý jáne sýdy burý jelilerin salý josparlanǵan. Sapaly aýyz sýmen 12 myń turǵyn qamtamasyz etiledi. Jeliler tóselgennen keıin jol jamylǵysy da retke keltiriledi.
Bulardan ózge, onyń málimeti boıynsha, Álmerek, Qaırat, Maıak, Jas Qanat, tómengi Pıatıletka, Nurshashqan sııaqty alty yqshamaýdandaǵy 614 kóshege syrtqy jaryq júıeleri ornatylady.
"Aýdandaǵy 12 kóshedegi 9,3 shaqyrym bolatyn jol ortasha jóndeýden ótken. 2021 jyly Nurshashqan yqsham aýdanyndaǵy 25 kóshede 5,1 shaqyrymǵa jetetin jańa jol salý josparlanýda. Qala turǵyndarynyń ómir súrý ortasyn jaqsartý jumystary jalǵasýda", dep atap ótti megapolıs ákimi.