Memleket basshysynyń «Jańa jaǵdaıdaǵy Qazaqstan: is-qımyl kezeńi» Joldaýynda ár saladaǵy salmaqty máselelerge mańyz berilip, negizgi baǵyttar aıqyndaldy.
Syr óńirinde basty qujattan týyndaıtyn mindetterdi júzege asyrý úshin oblys ákimi Gúlshara Ábdiqalyqovanyń tóraǵalyǵymen aktıv otyrysy ótkizilip, naqty mindetter júkteldi. Oblys ákiminiń orynbasary Serik Ahmet osy tapsyrmalardy oryndaý barysyndaǵy jumystar men josparlar jaıyn BAQ ókilderine baıan etti.
Memleket basshysynyń Joldaýyn keńinen nasıhattaý maqsatynda belgili tulǵalar men qoǵamdyq pikir kóshbasshylaryn tarta otyryp, respýblıkalyq jáne jergilikti BAQ-tar men áleýmettik jelilerde pikirler men maqalalar jarııalanýda. Sonymen birge arnaıy oblystyq medıa-jospar ázirlenip, bekitildi.
Joldaýda Memleket basshysy «Halyq únine qulaq asatyn memleket» negizi bılik pen qoǵam arasyndaǵy turaqty dıalog ekendigin atap aıtqany belgili. Bul eń aldymen azamattyq qoǵamdy damytý qajettigin kórsetedi. Bul baǵytta aımaqtaǵy úkimettik emes uıymdardyń basyn qosyp, olarǵa ádistemelik kómekter kórsetetin oblystyq «Azamattyq Alıans» qaıta quryldy. Aldaǵy ýaqytta azamattyq qoǵamnyń belsendiligin arttyrý maqsatynda óńirde «Áleýmettik jobalar jármeńkesin» ótkizý josparlanyp otyr.
Basty qujatta Prezıdent óskeleń urpaqtyń shyǵarmashylyq áleýetin damytýǵa nazar aýdaryp, «Balalar úıirmesi» qyzmetin qaıta qalypqa keltirýdiń mańyzdylyǵyn qozǵady. Osy rette mádenıet uıymdaryndaǵy balalar úıirmeleriniń jańa baǵytta jumys isteýine de nazar aýdarylady.
Qazir oblystaǵy 173 klýbta 854 úıirme turaqty jumys isteıdi, olarǵa 10 606 adam qatysady. Joldaý aıasynda aldaǵy jyly úıirme sanyn myńǵa, qatysýshylardy 11 500-ge jetkizý josparlanyp otyr.
– Memleket basshysy Joldaýda buqaralyq sportqa, dene tárbıesine erekshe mán bergenin, ár oblysta, iri qalalar men aýdan ortalyqtarynda balalar qatysatyn sport úıirmelerin ashý qajettigin tapsyrǵanyn bilesizder. Bizdiń oblysta onshaqty jyldan beri seksııalar jumysyn sabaqtan tys jáne keshki ýaqytta uıymdastyryp, osy arqyly buqaralyq sportty damytý tájirıbesi engizilgen. Qazir óńirde 21 balalar men jasóspirimder sport mektebi jumys isteıdi, onda 20 147 oqýshy 45 sport túrimen tegin shuǵyldanady, – dedi oblys ákiminiń orynbasary.
Syr óńirinde sońǵy eki jylda 16 sport kesheni paıdalanýǵa berilse, bıyl memleket-jekemenshik áriptestigi aıasynda josparlanǵan 12 jobanyń 5-eýi iske qosyldy.
S.Ahmet Joldaýda júktelgen mindetter men maqsattardy jastar saıasaty salasynda júzege asyrý úshin 5 baǵyt, 29 ındıkatordan turatyn «SYR JASTARY-2025» jol kartasynyń jobasy jasaqtalyp jatqanyn da aıtyp ótti.
Aldaǵy bes jylda 6 myńǵa jýyq jas «Jasyl el» jáne «Jas qurylysshylar» eńbek jasaqtarynyń qatarynda eńbek etetin bolady.
Keıingi tolqynnyń kásipkerlik bastamalaryn qoldaý úshin memlekettik granttar men ınvestısııalar tartylyp, óńirdegi NEET sanatyndaǵy jastardyń úlesin tómendetý kózdelip otyr. Jastardy jumyspen qamtý josparynyń aıasynda turaqty túrde oblystyq eńbek lagerin uıymdastyrý da bar.
Memleket basshysy Joldaýynda pandemııaǵa qarsy kúrestiń áli de jalǵasyp jatqandyǵy, másele týyndaǵan kezde ǵana shuǵyl qımyldamaı, aldyn ala sharalar qabyldaý qajettigi basa aıtyldy. Indettiń aldyn alý úshin halyq kóp shoǵyrlanatyn oryndarda zalalsyzdandyrý jumystary qarqyndy jalǵasýda.
Búginge deıin 13,9 mln sharshy metrdi quraıtyn aýmaq zalalsyzdandyrylypty. Tıisti memlekettik organdar, BAQ ókilderi men volonterlerden quralǵan 24 top karantın talaptarynyń saqtalýyn udaıy qadaǵalap otyr.
QYZYLORDA