Túrkistan oblysynda polıseıler ózgelerdi «blogermin» dep bopsalaǵan uıymdasqan qylmystyq toptyń jolyn kesti. Jergilikti 17 turǵyn men kásipkerler qylmystyq toptyń qurbany bolyp otyr.
Blogerdiń óz aýdıtorııasy men qoǵam aldyndaǵy jaýapkershiligi árdaıym mańyzdy. Jasyratyny joq, blogerlerdi «báleqorǵa» teńeýshiler de, qorqytyp bopsalaıtyn alaıaq deýshiler de joq emes. Jýrnalıstıkaǵa uqsastyǵy da, aqparatty jetkizýde ózgesheligi de bar bloger atyna aıtylatyn synǵa shamdanyp qalatynymyz da ras. «Itiń ury» dese namystanatyn qazaqpyz. Qarapaıym halyq bloger men jýrnalısti bir sanaıdy. Jýrnalısterdi túrli áreketimen, keıde saýatsyzdyǵymen uıatqa qaldyryp júrgenderi de jeterlik, myna oqıǵa da bizge aýyr tıip otyr. Degenmen mundaı qylmysqa baryp otyrǵandar bloger emes, blogerdiń atyn jamylǵan alaıaqtar ekeni anyq. Oqıǵaǵa oralaıyq.
Túrkistan oblysy polısııa departamenti bastyǵynyń orynbasary polısııa podpolkovnıgi Qurmanbek Sahov habarlaǵandaı, jergilikti 4 turǵynnan turatyn uıymdasqan qylmystyq top 6 aı boıy Jetisaı jáne Maqtaaral aýdandarynyń aýmaǵynda zańsyz jumys istegen. Iаǵnı jábirlenýshilerge ózderin bloger, jýrnalıst jáne zańger retinde tanystyryp otyrǵan olar bopsalaý men alaıaqtyq arqyly jeke kásipkerler men qarapaıym azamattardyń aqshalaryn ıemdengen. Jalpy alǵanda, qylmyskerler jábirlenýshilerge 2 000 000 teńgeden astam shyǵyn keltirgen. Tipti olar óz qyzmetine zańdylyq berý úshin tutynýshylardyń quqyqtaryn qorǵaý jáne sybaılas jemqorlyqqa qarsy kúres túrinde jalǵan qoǵamdyq uıym ashqan. Sonymen qatar jalǵan kýálikter men esimhattar jasaǵan.
«Qylmyskerler barlyq áreketterdi beınetaspaǵa túsirip, áleýmettik jelilerde beınejazbalardy jarııalaımyz dep qorqytyp, olardan aqsha talap etken. Mysaly, 2019 jyly Maqtaaral aýdanynda kúdiktiler qurylys alańdarynyń birine barǵan. Sodan qurylys jumystary sapasyz, buzýshylyqtarmen júrgizilip jatyr degen syltaýmen qurylys fırmasynyń basshysynan 500 myń teńge talap etken. Basqa jaǵdaıda, ıaǵnı ótken jyldyń kúzinde ekologııany qorǵaý jeleýimen jergilikti fırmalardyń biriniń keńsesine kelip, dırektordan aı saıyn 100 myń teńge kóleminde tólem talap etken. Jábirlenýshi óz kezeginde Jetisaı APB-ne aryzdanǵan. «Jasalǵan qylmystardyń aýyrlyǵy men biregeıligin eskere otyryp, qylmysty ashýǵa jáne tergeýge oblystyq krımınaldyq polısııa qyzmetkerleri men tergeýshileri aýdandyq polısııa qyzmetkerlerine kómekke jiberildi. Iаǵnı, biz aýdandyq jáne oblystyq polısııanyń úzdik qyzmetkerlerinen arnaıy jedel-tergeý tobyn qurdyq. Sotqa deıingi tergeý aıasynda barlyq qajetti jedel jáne tergeý sharalary júrgizildi, jetkilikti dálelder jınaqtaldy jáne qylmyskerler aqsha alý kezinde ustaldy. Osy qylmystyq toptyń ár qatysýshysynyń 10 aı ishindegi kinási tolyǵymen dáleldendi. Sonymen qatar bul top uıymdasqan sıpatta bopsalaý men alaıaqtyqtyń 17 jaıtyna qatysty bolyp shyqty», deıdi polısııa podpolkovnıgi Qurmanbek Sahov.
Polısııa departamentiniń habarlaýynsha, qylmystyq toptyń uıymdastyrýshysy men músheleri QR QK-niń 262-babynyń 1-bóliginde «Uıymdasqan top, qylmystyq uıym qurý jáne oǵan basshylyq etý, sol sııaqty olarǵa qatysý», 194-babynda «Qorqytyp alýshylyq» jáne 190-babynda «Alaıaqtyq» kózdelgen qylmystardy jasaǵany úshin 10 jáne 8 jylǵa bas bostandyǵynan aıyryldy.
Bir ýaqytta bireýdiń hobbıi, erikkendegi ermegi bolǵan blog jazýyńyz búginde kásipke aınalǵan. Ras, blogerdiń jazǵany men jumysyn ústinen qaraıtyn bastyǵy, bekitilgen jumys rejimi joq. Degenmen búginde elge tanylyp úlgergen, aqparat taratýda ózindik erekshelikteri bar blogerler óz isine, ár sózine jaýapkershilikpen qarap, tártipke, zańǵa baǵyný syndy talaptardy jadynan shyǵarmaıtyny anyq. Iаǵnı «blogermin» deıtindermen sóılespes buryn jan-jaqty tekserip, anyqtap alǵan, quqyqtyq saýatty arttyrǵan jón. Osy oraıda Túrkistan oblysynyń polıseıleri azamattardy qyraǵy bolýǵa jáne túrli alaıaqtarǵa senbeýge shaqyrýda.
Túrkistan oblysy