T.Q.Júrgenov atyndaǵy Qazaq ulttyq óner akademııasynyń rektory Aqan Abdýalıev kópshilik aldynda esep berý kezdesýin onlaın rejimde ótkizdi, dep habarlaıdy Egemen.kz
QR Prezıdenti Qasym-Jomart Toqaev ortalyq atqarýshy organdar basshylarynyń, ákimderdiń jáne ulttyq joǵary oqý oryndary rektorlarynyń halyqqa esep berý kezdesýlerin ótkizý týraly jarlyqqa ózgeris engizgen edi. Osy ózgeristerge saı onlaın-translıasııalar uıymdastyra otyryp, jurtshylyq ókilderimen esep berý kezdesýlerin ótkizý týraly tapsyrma berilgen edi. Atalǵan úndeý aıasynda T.Q.Júrgenov atyndaǵy QazUО́A rektory 2019-2020 oqý jylynda atqarylǵan jumystar jaıymen bólisip, kezekti esep berý jıynyn uıymdastyrdy.
Shara ZOOM, YouTube platformalary, Instagram, Facebook áleýmettik jelileri arqyly ótti. Qazaqstannyń mádenıet jáne sport mınıstrliginiń ókilderi, Qazaqstannyń jetekshi joǵarǵy oqý oryndarynyń rektorlary, teatr jáne óner mektepteriniń basshylary, BAQ ókilderi, akademııa ujymy, ata-analar, stýdentter onlaın esep berý jıynynyń kýási boldy.
T.Q.Júrgenov atyndaǵy QazUО́A rektory óz baıandamasynda bilim ordasynyń birqatar jetistikterin atap ótti. О́tken jylǵy álemniń jetekshi reıtıngteri Webometrics málimetterine sáıkes, akademııa Qazaqstan boıynsha – 42 oryn ıelengen bolsa, halyqaralyq ARES reıtıngisinde óz kórsetkishterin joǵarylatyp – 19 orynǵa taban tiredi. Sondaı-aq, jetekshi reıtıng bolyp tabylatyn Akkredıtteý jáne reıtıng táýelsiz agenttigi (NAAR) akademııanyń ulttyq bilim berý naryǵyndaǵy jetekshi ornyn kezekti ret moıyndady. Bas reıtıng qorytyndysy boıynsha Qazaqstan Respýblıkasy joǵary oqý oryndarynyń arasynda akademııa 8 oryndy ıelense, óner bilim berý ordalarynyń arasyndaǵy reıtıngte birinshi oryndy ıelenip kósh bastap tur.
A.Abdýalıev akademııanyń aldaǵy josparlaryna da keńirek toqtalyp ótti. Sonyń ishinde, Memleket basshysy Qasym-Jomart Toqaevtyń: "Aldaǵy 5 jyldyń ishinde keminde 90 myń jataqhana orny salynýy kerek. Jataqhana óte ózekti ári ómirlik máni bar másele", degen tapsyrmasyna oraı, T.Q. Júrgenov atyndaǵy QazUО́A-ǵa 300 oryndyq jataqhana salýdy josparǵa engizgenin jetkizdi.