Baspasóz qyzmetiniń málimetinshe, bul transformasııa ulttyq sporttyń Qazaqstanda jáne halyqaralyq arenada odan ári damýyna qýatty serpin berýdi kózdeıdi. Buǵan deıin Qazaq kuresi úsh uıymnan - álemdik, respýblıkalyq, halyqaralyq federasııalardan turatyn. Bul ulttyq birinshilikti tıimdi basqarý men damytý prosesin edáýir qıyndatty, dep habarlaıdy Egemen.kz
"Qaıta qurý uıym qyzmetin ortalyqtandyrýǵa, apparatty ustaý shyǵyndaryn ońtaılandyrýǵa, qarama-qaıshylyqtar sebebin jáne is-árekettiń bytyrańqylyǵyn joıýǵa múmkindik beredi. Sonymen birge halyqaralyq arenada jáne Qazaqstanda aýqymdy mindetterdi bir uıym sheńberinde júzege asyrýǵa jaǵdaı jasaıdy", - dep túsindirdi Qazaq kuresi assosıasııasynyń bas dırektory Abat Imambaev.
Qazaq kuresi assosıasııasy Nur-Sultanda 2020 jyldyń aqpanynda quryldy. Búginde ol biryńǵaı ortalyqtandyrylǵan uıymǵa aınaldy. Qazaq kuresi assosıasııasynyń prezıdenti - Kárim Másimov.
"Qazirdiń ózinde qazaq kúresin damytý jáne nasıhattaý boıynsha aýqymdy jumys júrgizilýde. Ǵylymı-tájirıbelik bazany nyǵaıtý, bilim berý baǵdarlamalaryn iske asyrý, mamandardy qaıta daıarlaý jáne olardyń biliktiligin arttyrý maqsatynda "Jekpe-jek" saraıy bazasynda Qazaq kuresi akademııasy quryldy. Ol tıisti baǵdarlamalar ázirlep, kadrlardy qaıta daıarlaıdy jáne biliktiligin arttyrady, ǵylymı zertteýler júrgizip, aımaqtyq jáne halyqaralyq taqyryptyq forýmdar ótkizedi.
Ulttyq sportty nasıhattaý balalar sportynyń damyp, buqaralyq sıpat alýynsyz múmkin emes. Sondyqtan mektepterde qazaq kúresin damytýdyń arnaıy baǵdarlamasy jasalyp, júzege asyryldy. Qazir on elordalyq mektep bazasynda seksııalar ashyldy. Assosıasııanyń "Nazarbaev Zııatkerlik mektepteri" DBBU-men birlesken is-qımyl jospary jasaldy. Dene shynyqtyrý muǵalimderi oqý semınarlaryna qatysyp, balalar úshin chempıon balýandarmen kezdesýler uıymdastyrylady", - deıdi assosıasııanyń baspasóz qyzmetindegiler.
Pandemııany eskere otyryp, Qazaq kuresi boıynsha beıne oqýlyqtar daıyndalyp jatyr.
"Qazaq kuresi ulttyq sportynyń strategııalyq jarnamasy men keńinen taralýy Elbasy - Qazaqstannyń Tuńǵysh Prezıdenti N.Á.Nazarbaevtyń "Rýhanı jaǵyrý" baǵdarlamasyna sáıkes keledi. О́ıtkeni jobanyń túpki maqsaty - qazaq halqynyń ulttyq biregeıligin saqtaý jáne nyǵaıtý, qazaq kúresin nasıhattaý arqyly halyqaralyq arenada Qazaqstannyń oń ımıdjin qalyptastyrý", – deıdi Imambaev.
Jańadan qurylǵan Assosıasııanyń aldynda sheshýdi qajet etetin kúrdeli mindetter tur: bul – ulttyq mádenı mura jáne ulttyq birinshilik retinde qazaq kúresin damytý, damytý qyzmetin jan-jaqty aqparattyq qoldaý, mektep jasyna deıingi balalar, mektep oqýshylary, TjKB, JOO stýdentteri, quqyq qorǵaý organdarynyń qyzmetkerleri, arnaıy memlekettik organdar jáne áskerı kafedralar úshin Qazaq kuresi boıynsha bilim berý baǵdarlamalaryn engizý.
Taǵy bir basym baǵyt - balalar men jastar arasynda buqaralyq, kásibı sportty, sondaı-aq múmkindigi shekteýli jandarǵa arnalǵan sport túrlerin Qazaq kuresi (-sýrdo, -tıflo Qazaq kuresi) arqyly damytý, oqý-ádistemelik jáne zertteý qyzmetin uıymdastyrý jáne júzege asyrý. Túpki maqsat - Qazaq kuresi ulttyq brendin qalyptastyrý. Ataqty balýan, qazaqtyń tuńǵysh klassıkalyq kúresten Olımpıada chempıony Jaqsylyq Úshkempirov óziniń sońǵy suhbattarynyń birinde shashyrańqy Qazaq kuresi federasııalaryn birigýge shaqyrǵan bolatyn.