Eýropa sahnasyn ekiniń biri eńsere bermeıdi. Qazaq ánshileriniń ishinde mundaı shyńdy baǵyndyrǵan jandar neken-saıaq. Jaqynda Qazaqstannyń halyq ártisi Nurjamal Úsenbaeva kórkemóner jáne mádenı qyzmet salasyndaǵy joǵary nagradanyń biri – Eýropalyq óner odaǵy tarapynan beriletin «Altyn Eýropamen» («Golden Europea») marapattaldy. Bul tek bir adamnyń ǵana basyndaǵy qýanyshty jaǵdaı emes, jalpy qazaq ulttyq opera óneriniń ortaq jetistigi retinde baǵalanýda.
Eýropa sahnasyn ekiniń biri eńsere bermeıdi. Qazaq ánshileriniń ishinde mundaı shyńdy baǵyndyrǵan jandar neken-saıaq. Jaqynda Qazaqstannyń halyq ártisi Nurjamal Úsenbaeva kórkemóner jáne mádenı qyzmet salasyndaǵy joǵary nagradanyń biri – Eýropalyq óner odaǵy tarapynan beriletin «Altyn Eýropamen» («Golden Europea») marapattaldy. Bul tek bir adamnyń ǵana basyndaǵy qýanyshty jaǵdaı emes, jalpy qazaq ulttyq opera óneriniń ortaq jetistigi retinde baǵalanýda.
Opera ánshisi Chehııa astanasy – Pragada ótken qaıyrymdylyq gala-konsertine qatysyp, týǵan jerge altyn músinshemen jáne dıplommen oraldy. Mundaı aıtýly marapatqa dúnıe júzi boıynsha nebári 20 adam ǵana ıe bolǵan eken.
Saltanatty gala-konsert pragalyq Rýdolfınýmde, aýyr dertke shaldyqqan balalardy qoldap, olardyń zamanaýı tehnologııamen jabdyqtalǵan eń úzdik medısınalyq mekemelerde emdelýine múmkindik berý maqsatynda qarjy jınaý úshin ótken bolatyn.
Sondaı-aq, gala-konsertte álemdik opera sahnasynyń juldyzy – barıton Fılıp Bandjak (Chehııa Respýblıkasy) Ońtústik chehııalyq Kameralyq orkestrdiń súıemeldeýimen óner kórsetti. Klassıkalyq shyǵarmalar Petr Hromchaktyń dırıjerlik etýimen oryndaldy.
Kúmiskómeı ánshi aqparat quraldary ókilderimen bolǵan áńgimede chehııalyq konservatorııa zalynyń tamasha akýstıkasyna aıryqsha toqtalyp ótti. Kesh baǵdarlamasynda G.Donısettıdiń, Dj.Verdıdiń, Dj.Rossınıdiń shyǵarmalary shyrqalǵanyn jetkizdi. Ásirese, kórermenge A.Dvorjaktyń «Sý perisi» operasynan Sý perisiniń arııasy qatty unaǵanyn baıandaı kelip: «Men bul shyǵarmaǵa óte joǵary jaýapkershilikpen daıyndaldym, sebebi, cheh kórermenderine arııany olardyń ana tilinde minsiz oryndaý kútpegen syı boldy. Ol úshin biraz ýaqyt mátinmen, ekpinmen tynbaı jumys isteýge týra keldi. Mine, sonyń nátıjesi bolar, ándi oryndap bitkennen keıin meni zaldaǵy jurt sahnaǵa qaıta-qaıta qol soǵyp shaqyrýmen boldy», – dedi N.Úsenbaeva.
Al ánshini týǵan jerge tabany tıisimen «Astana Opera» teatrynda ótetin «Birjan-Sara» operasyndaǵy Saranyń partııasy kútip tur. Ol elimizdiń bas teatrynyń bıik sahnasynda halyqtyń aqyn qyzynyń qaıtalanbas beınesin somdaıdy, al ánshi-kompozıtor, aqyn Birjan saldy Reseıdiń eńbek sińirgen ártisi Ahmet Agadı oryndaıdy.
Qarashash TOQSANBAI,
«Egemen Qazaqstan».