Kún raıynyń kúrt sýytýyna baılanysty Jetisý ólkesinde de jylytý maýsymy jyldaǵydan erte bastaldy. Birinshi kezekte áleýmettik nysandarǵa jylý berilse, turǵyn úıler de kezegimen jylytylýda.
Jylýǵa degen suranys negizinen oblys ortalyǵynda artyp tur. Taldyqorǵan qalasynda ortalyq jylytý júıesine qosylǵan 82 bıýdjettik mekeme men 753 kópqabatty turǵyn úı bar. Endi bul nysandardaǵy adamdar jaýramaıtyn boldy. Jalpy, bıylǵy jylytý maýsymyna daıyndyq jumystaryna bıýdjetten 15,9 mlrd teńge qarjy bólingen bolatyn. Onyń ishinde jylýmen jabdyqtaý nysandaryn jóndeý úshin 6 mlrd teńge, kómir, mazýt, dızel otynyn satyp alýǵa 9,4 mlrd teńge, jylý júıelerin jóndeýge jáne qajetti qural-jabdyq satyp alýǵa 538 mln teńge bólinse, kásiporyndardyń óz qarajattary esebinen 2,1 mlrd teńge taǵy qarastyrylǵan.
Aýdandarda da jylý berý maýsymy bastaldy. Onyń ishinde kóppáterli úılerdi ortalyq jylý júıesine qosý men jeke qazandyqtarǵa jalǵaý isi bıyl alǵash ret júzege asqan aýdandar da bar. Máselen, Qarasaı jáne Talǵar aýdandarynda myńnan asa abonentteri bar 23 kóppáterli turǵyn úı ortalyq jylý júıesine qosylǵan. Bul úshin 14 jeke jylý qazandyǵy salyndy.
Sondaı-aq bıyl Qaratal, Qarasaı, Eńbekshiqazaq jáne Panfılov aýdandarynda 108 kóppáterli turǵyn úıdi jylytý úshin 33 jeke qazandyqty iske qosý jobasy ázirlengen bolatyn. Al aldaǵy jyly Eńbekshiqazaq, Qarasaı, Uıǵyr, Kóksý jáne Ile aýdandarynda 17 modýldi qazandyq salý úshin 254,3 mln teńge bólinip otyr eken. Nátıjesinde 106 kóppáterli turǵyn úı ortalyq jylý júıesine qosylmaq.
Aıtpaqshy, aımaqtaǵy jylytý qazandyqtary men jeke úıler 379,5 myń tonna kómir tutynady. Qazir qajetti qatty otyn daıyndaý 80 paıyzdan asty. Oblys boıynsha 64,3 shaqyrym jylý magıstrali, 13,4 myń shaqyrym elektr jelisi, 3 016 transformator stansasy men basqa da qurylǵylar jóndeýden ótip, qysqy maýsymǵa saqadaı saı bolyp tur.
Almaty oblysy