Keshe Premer-Mınıstr Kárim Másimov Qazaqstanda sandyq teleradıohabar taratýdy engizý máseleleri jóninde keńes ótkizdi, dep habarlady Premer-Mınıstrdiń baspasóz qyzmeti.
Sandyq telehabar taratýǵa kóshý Qazaqstan Respýblıkasynyń 2020 jylǵa deıingi strategııalyq damý josparynyń sheshýshi baǵyttarynyń biri retinde qazirgi zamanǵy aqparattyq-kommýnıkasııalyq keńistik qurý qajettiligine jáne Prezıdent Nursultan Nazarbaevtyń tapsyrmasyna baılanysty júzege asyrylyp otyr.
Baılanys jáne aqparat mınıstrligi júrgizgen aǵymdaǵy tehnıkalyq jáne ekonomıkalyq múmkindikterge taldaý nátıjesinde eleýli tehnıkalyq jáne ekonomıkalyq artyqshylyqtarǵa ıe habar taratýdyń ulttyq operatoryn qurý jáne sandyq jerústi, kabeldi, spýtnıktik jáne mobıldi taratý standarttaryn anyqtaý jóninen birqatar usynystar engizildi. Sol sııaqty jergilikti jerlerdiń jer bederin, klımattyq jaǵdaılary men halyqtyń ornalasýyn eskere otyryp sandyq habar taratýdyń jospary da ázirlenetin bolady.
Premer-Mınıstr bútindeı alǵanda usynysty qoldady jáne sandyq teledıdar engizý, sondaı-aq onyń normatıvtik-quqyqtyq bazasyn jetildirý jóninen birqatar tapsyrmalar berdi.