Ýaqyt talabyna saı atqarylýy tıis aýqymdy mindetter óte kóp. Solardyń arasynda «Halyq únine qulaq asatyn memleket» tujyrymdamasyn iske asyrý, qoǵam men bılik arasynda turaqty dıalog, tıimdi keri baılanys ornatý mindeti úlken mańyzǵa ıe. Sol sebepti atqarýshy bılik qyzmetiniń negizgi baǵyttary bolyp sanalatyn azamattyq qoǵamǵa qoldaý kórsetý, onyń áleýetin nyǵaıta túsý, qoǵamdyq dıalog, ashyqtyq, adamdardyń talap-tilek, muń-muqtajyna barynsha jedel kóńil bólý, azamattardyń quqyǵyn qorǵaý máseleleri óz deńgeıinde sheshimin tabýy tıis. Bul oraıda jergilikti basqarý organdaryna da artylatyn jaýapkershilik aýqymdy. Sondyqtan da Prezıdent Q.Toqaev jergilikti bılik organdary jumysynyń tıimdiligin arttyrý máselesin kún tártibine shyǵarǵan bolatyn. Jergilikti bıliktiń turǵyndarǵa qoljetimdi bolýyn qamtamasyz etý, jergilikti bılik jumysynyń tıimdiligin baǵalaý júıesin engizý, jergilikti bıýdjetti qalyptastyrýǵa azamattyq qoǵamnyń, ıaǵnı halyqtyń belsene aralasýyn jolǵa qoıý arqyly ıgi ister atqarylyp keledi. Máselen, bıyl respýblıkalyq «Úzdik aýyl ákimi» baıqaýyn uıymdastyrý arqyly ákimderdiń halyqpen tıimdi jáne keri baılanys ornatý jónindegi qyzmeti baǵalanǵanyn erekshe atap ótý lázim.
Memleket basshysy Q.Toqaev bıylǵy «Jańa jaǵdaıdaǵy Qazaqstan: is-qımyl kezeńi» atty Joldaýynda aýyldyq okrýg ákimderin jergilikti halyqtyń ózi tikeleı saılaý arqyly tańdaýǵa bolatynyn atap kórsetti. Eger solaı bolsa, bul óz kezeginde ákimderdiń el aldyndaǵy jaýapkershiligin arttyrý baǵytyndaǵy oń qadam bolar edi.
Búgin biz joǵaryda atalǵan jaǵdaıattarǵa oraı «Halyq únine qulaq asatyn memleket» tujyrymdamasyn júzege asyrý, halyqpen keri baılanys ornatý, jergilikti organdar jumysynyń tıimdiligin arttyrý boıynsha atqarylyp jatqan jumystardyń ishki mazmunyn sıpattaıtyn maqalalar toptamasyn nazarlaryńyzǵa usynýdy jón kórdik.
Memlekettik qyzmet isteri agenttiginiń bastamasymen «Rýhanı jańǵyrý» baǵdarlamasy aıasynda «Úzdik aýyl ákimi» respýblıkalyq baıqaýy aıaqtaldy. Úzdik aýyl ákimi bolyp Almaty oblysy, Ile aýdanynyń Boraldaı kenti ákimi Danııar Qońyrbaev anyqtaldy.
D.Qońyrbaev daýys berý kezinde eń kóp upaı jınap, 1-orynǵa ıe boldy jáne óz aımaǵynyń áleýmettik-ekonomıkalyq jaǵdaıyn jaqsartý boıynsha jobasyn sátti qorǵap shyqty.
2-oryndy 2 ákim ıelendi. Olar: Aqmola oblysy, Selınograd aýdany, Mánshúk aýyldyq okrýginiń ákimi Ǵanı Isaev jáne Aqtóbe oblysy, Muǵaljdar aýdany, Taldysaı aýyldyq okrýginiń ákimi Qazbek Aqqaıyr.
3-oryndy da 2 ákim ıelendi: Pavlodar oblysy, Aqtoǵaı aýdany, Jalaýly aýyldyq okriginiń ákimi Azamat Medetov jáne Shyǵys Qazaqstan oblysy, Jarma aýdany, Shalabaı aýyldyq okrýginiń ákimi Janar Esembaeva.
Sondaı-aq «Úzdik áleýmettik-ekonomıkalyq joba» atalymy Jambyl oblysy, Rysqulov aýdany Abaı aýyldyq okrýginiń ákimi Muratbek Arystambekovke, «Halyqqa ashyq ákim» atalymy Qaraǵandy oblysy Buqar jyraý aýdany Sentralnyı aýyldyq okrýginiń ákimi Samat Meırmanovqa, «Úzdik isker-sharýa ákim» atalymy Atyraý oblysy Isataı aýdany Tushyqudyq aýyldyq okrýginiń ákimi Mádı О́teǵalıevke tabystaldy.
Respýblıkalyq konkýrstardyń jeńimpazdary men qatysýshylary Memlekettik qyzmet isteri agenttigi tóraǵasy Anar Jaılǵanovanyń atynan gramotalarmen, dıplomdarmen jáne alǵys hattarymen marapattaldy. Konkýrstyń maqsaty eldiń aýyldyq eldi mekenderindegi jergilikti ózin-ózi basqarýdy damytý, jergilikti bastamalardy, onyń ishinde qoǵamdyq ózin-ózi basqarý uıymdaryn yntalandyrý, jumysta joǵary nátıjelerge qol jetkizgen, aýyldyq eldi mekenderdi damytýǵa eleýli úles qosatyn úzdik aýyl ákimderin anyqtaý jáne kótermeleý bolyp tabylady.
Konkýrs eki kezeńnen turdy. Respýblıkalyq baıqaýdyń birinshi kezeńi oblystyq deńgeıde ótti. Elimizdiń 14 óńirinen kelgen úzdik ákimder respýblıkalyq baıqaýǵa jiberildi.
«2019 jyly el Prezıdenti Qasym-Jomart Toqaev óziniń alǵashqy Joldaýynda «Qýatty óńir – qýatty el» dep, óńirlerdegi jergilikti bılik jumysyn tıimdiligin baǵalaý júıesin engizý kerek dep aıtqan bolatyn. Osyǵan oraı Memlekettik qyzmet isteri agenttigine «Úzdik aýyl ákimi» respýblıkalyq baıqaýyn uıymdastyrý jáne ótkizý júktelgen edi. Bıyl da Memleket basshysy Qasym-Jomart Toqaev «Jańa jaǵdaıdaǵy Qazaqstan: is-qımyl kezeńi» atty Joldaýynda da aýyldyq okrýg ákimderin tikeleı saılaýǵa bolatynyn atap kórsetti. Aldaǵy ýaqytta táýelsiz Qazaqstan jaǵdaıynda buǵan deıin bolmaǵan tájirıbe – aýyl ákimderin tikeleı saılaýǵa qoǵam tarapynan da qyzyǵýshylyq artyp otyr», dedi Memlekettik qyzmet isteri agenttigi tóraǵasynyń orynbasary Darhan Jazyqbaev agenttikte ótken respýblıkalyq komıssııa otyrysynda.
Konkýrstyń birinshi kezeńinde agenttiktiń aýmaqtyq departamentteri oblystardyń ákimdikterimen konkýrs ádistemesine sáıkes jumys júrgizdi. Oblystyń Ádep jónindegi ýákilderimen birlesip arnaıy saýaldama ázirlendi.
Osy baǵytta turǵyndardyń pikiri eskerildi jáne úmitkerlerdiń memlekettik qyzmetshilerdiń etıkasyn saqtaýy boıynsha qorytyndy berildi. Budan basqa ákimderdiń halyqpen tıimdi jáne keri baılanysty jolǵa qoıý jónindegi qyzmeti baǵalandy, osy baǵytta qol jetkizilgen nátıjeler zerdelendi.
Memleket basshysy Q.Toqaevtyń «Halyq únine qulaq asatyn memleket» tujyrymdamasyn iske asyrý, ıaǵnı halyqpen keri baılanys ornatý jáne máselelerdi ýaqtyly sheshý maqsatynda aýyl turǵyndary úshin «Ashyq ákimdik», «Ashyq dıalog» formattarynda toqsan saıynǵy kezdesýler ótkizý tájirıbesi engiziledi.
Aýyl turǵyndaryna memlekettik qyzmetterdiń qoljetimdiligin qamtamasyz etý maqsatynda, aýyl ákimdikteriniń kóptegen ǵımarattarynda ózine-ózi qyzmet kórsetý buryshtary ashylǵan.
Aýyl ákiminiń turǵyndarmen ashyq qarym-qatynasy jáne ózekti máseleler boıynsha ýaqtyly sheshim qabyldaý nátıjesinde halyqtyń áleýmettik máseleleri sheshiledi.
Prezıdent óziniń 2019 jylǵy Qazaqstan halqyna Joldaýynda jergilikti bıliktiń turǵyndarǵa qoljetimdi bolýyn atap ótken bolatyn. Sondaı-aq «Halyq únine qulaq asatyn memleket» tujyrymdamasy aıasynda baǵalaý rásimderiniń mindetti talaptarynyń biri oblys ákimdikteriniń saıtynda ornalastyrylǵan 16 krıterıı boıynsha onlaın-daýys berý túrinde ótken ákimderdiń jumysyna halyqtyń qanaǵattanýyn ólsheý bolyp tabylady.
Úmitkerler aýyldyq okrýgti damytýǵa, aýyldyq jerlerdiń áleýmettik-ekonomıkalyq problemalaryn sheshýge baǵyttalǵan jobalyq jumys, sondaı-aq «Men nege «Úzdik aýyl ákimi» ataǵyna laıyqpyn?» taqyrybynda esse daıyndady.
Eń joǵary ball jınaǵan kandıdatpen respýblıkalyq komıssııa jeke onlaın áńgimelesý ótkizdi. Onyń quramyna Prezıdent Ákimshiliginiń, Memlekettik qyzmet isteri agenttiginiń jáne Aýyl sharýashylyǵy mınıstrliginiń qyzmetkerleri, Parlament depýtattary, qoǵamdyq uıymdary men BAQ ókilderi kirdi.
Komıssııa músheleri olardyń esselerin, jazýdaǵy kreatıvti tásilderin oń baǵalady, sondaı-aq jeńimpazdardyń jobalyq jumystary basqa qatysýshylardyń jumystarymen salystyrǵanda úzdik shyqty.