Túrkistan oblysynda koronavırýstyń ekinshi tolqynyna daıyndyq kúsheıdi. Indet qaıta beleń alǵan jaǵdaıda dári tapshylyǵy bolmas úshin eki aılyq qor jınalyp, oblys aýrýhanalary tynys alý apparattarymen qamtylýda. Qajet bolǵan jaǵdaıda qosymsha tósek-oryndar sany 5,5 myńǵa deıin jetkiziledi.
Oblys ákimi О́mirzaq Shókeevtiń tapsyrmasymen aýdandyq aýrýhanalar kompıýterlik tomografpen, PTR zerthanalarymen jáne sıfrly rentgendermen jabdyqtaldy. О́kpeni jasandy jeldetý apparattary men ottegi konsentrattary da ár aýdandaǵy emdeý mekemelerine taratylǵan. 12 jyljymaly medısınalyq keshen aýdandarǵa jetkizilýde. Naýqastardy der kezinde anyqtap, qyzmet kórsetý maqsatynda arnaıy ýchaskeler men mobıldi toptar qurylǵan. О́.Shókeevtiń tóraǵalyǵymen ótken lezdemelik májiliste osyndaı málimetter keltirildi.
Al oblystaǵy Polısııa departamenti óńirdiń bas sanıtarlyq dárigeriniń qatań karantındik shekteý sharalaryn engizý qaýlysyna sáıkes kúsheıtilgen túrde jumys atqarýda. Sondaı-aq óńirdegi barlyq nysandardaǵy sanıtarlyq talaptyń saqtalýyn qoǵamdyq baqylaý múshelerinen qurylǵan arnaıy monıtorıngtik top baqylaıdy. Reıdtik tekseriske shyǵyp, bas sanıtar dárigerdiń qaýlysyn elemegenderge ákimshilik shara qoldanýda. Mysaly, 53 mobıldi top koronavırýstyń taralýyna jol bermeý maqsatynda júrgizilgen arnaıy reıd kezinde kásipkerlik nysandardy aralap, belgilengen sanıtarlyq normalardyń saqtalýyn tekserdi. Naqtyraq aıtsaq, 5 shilde men 10 qazan aralyǵynda 30 myńǵa jýyq nysandy aralaǵan mobıldi top karantın talaptaryn buzǵan 3 701 nysandy anyqtady. Ákimshilik quqyqbuzýshylyq týraly hattama toltyrylyp, 150 217 470 teńge kóleminde aıyppul salyndy. Toı-jıynǵa tyıym salynǵanyna qaramastan óńirde jekelegen azamattar kelin túsirip, qyz uzatyp, jıyn ótkizýdi toqtatpaı tur. Mobıldi toptyń tekserýimen jalpy 236 otbasylyq, merekelik is-shara anyqtalyp, toı ýaqytynan buryn toqtatylǵan. Búginde barlyq aýdandarda ekinshi tolqynǵa daıyndyq sharalary kúsheıtilip, jumys baqylaýǵa alynǵan.
Mysaly, 120 myńnan astam turǵyny bar Ordabasy aýdanynda oblystyq qoǵamdyq densaýlyq basqarmasynyń qoldaýymen 100 oryndyq gospıtal salynýda. Aýdan ákimi Nurbol Turashbekov burynǵy bosaný, hırýrgııa, reanımasııa bólimsheleri ornalasqan ǵımaratqa kúrdeli jóndeý jumystary júrgizilip, provızorlyq orynǵa aınaldyrylǵanyn aıtady. Nysannyń káriz, elektr jelisi, sý qubyrlary túgelimen jańartylǵan. Jaqyn kúnderi kógildir otynnyń da máselesi sheshilmek. Munda 22 bokstyq palata bolady. Jansaqtaýǵa arnalǵan eki zal jasaqtalǵan. Jańa provızorlyq bólimshege ortalyqtandyrylǵan 14 ottegi núktesi kirgiziledi. Odan bólek aýrýhananyń ýaqytsha ızolıator, terapııa, jansaqtaý bólimshelerinde 64 ottegi núkteleri ornalasqan. Buǵan deıin emdeý mekemesine demeýshiler jáne oblystyq basqarma tarapynan 30 ottegi konsentratory berilgen. Aýrýhanaǵa qarasty 11 dárigerlik ambýlatorııanyń árqaısysyna 2 danadan, emdelýshisi kóp keıbir ambýlatorııaǵa 3 dana ottegi konsentratorynan úlestirilipti. Odan bólek mekemede ókpeni jasandy jeldetýge arnalǵan 16 apparat bar. Ortalyq ishinen 20 tósektik observasııa daıyn. Sondaı-aq aýrýhana basshylyǵy provızorlyq ortalyq ishinen bosandyrý kabınetin de jasaqtap qoıypty. Odan bólek aýrýhanada 4 operasııa zaly bar. Kelgen naýqastardyń dene qyzýyn ólsheıtin fıltr bólmesi de jóndeýden ótkizilgen. Mekemeniń 2 aıǵa jetetin dári-dármek qory bar. Basqarma tarapynan jáne gýmanıtarlyq kómek arqyly kelgen preparattardyń barlyǵyn arnaıy qoımada saqtaýda. Pandemııa kezinde aýrýhana koronavırýs ınfeksııasyn anyqtaý úshin analızderdi oblys ortalyǵyna jiberip otyrǵan. Endi mamandar mundaı ábigerge túspeıdi. Sebebi aýrýhanaǵa koronavırýs ınfeksııasyn anyqtaıtyn apparat ornatyldy.
Aýdan halqyna munda 8 reanımatolog, 3 ınfeksıonıst, 50-ge jýyq jalpy tájirıbeli dáriger, 5 terapevt qyzmet kórsetýde. Atalǵan mamandardyń barlyǵy koronavırýs juqtyrǵan naýqastardy emdeýge arnalǵan emdeý hattamalarymen tanysyp, túrli konferensııalarǵa qatysyp, tájirıbe jınaqtaýda.
«Pandemııa kezinde kóptegen naýqastar aýyr halde jetkizildi. Aýrýdyń bulaısha batpandap kirýine olardyń dert qylań bere bastaǵan sátte dárigerge qaralmaı, óz betinshe dári-dármekti qabyldaı bergeni sebep bolyp otyr. Bul – úlken qatelik. О́ıtkeni beıbereket qoldanylǵan preparattar vırýstyń deńgeıin basyp jiberedi de, aýrýdyń klınıkalyq belgileri bilinbeı qalady. Bul dárigerlerge dıagnoz qoıýǵa, aýrýdyń deńgeıin anyqtaýǵa úlken kedergi keltiredi. Antıbıotıkterdi qabyldaı bergesin bizdiń jasaǵan em-domymyz áser etpeı qalady. Mine, osyndaı óreskel qateliktiń kesirinen qanshama pasıent tıisti deńgeıde em-shara qabyldaı almady. Endigi kezekte turǵyndar mundaı qatelikke boı aldyrmaýy kerek. Mamandar túsindirý jumystaryn júrgizgen kezde halyqqa osy jaǵdaıdy da qaıta-qaıta eskertýde», deıdi ortalyq aýrýhananyń bas dárigeri Baqytjan Myrzageldıev.
Túrkistan oblysy