«Azamattarǵa arnalǵan úkimet» memlekettik korporasııasynyń Túrkistan oblystyq fılıaly jýyrda ǵana úshem týǵan kópbalaly anany quttyqtap, oǵan kómektesý úshin úıine arnaıy jasaqtalǵan mobıldi top jiberdi.
«Buǵan deıin 3 balasy bar 23 jastaǵy Erkinaı Esenbaeva dúnıege úshem ákelip, kópbalaly analardyń qataryna qosylǵany týraly aqparatty baspasóz quraldarynan bildik. Sondaı-aq bala týýǵa baılanysty memlekettik qyzmetterdi rásimdeýge úshemniń ata-anasynyń ýaqyty bolmaı júrgendigin estisimen, birden habarlasyp, óz kómegimizdi usyndyq. Arnaıy shalǵaı óńirlerge qyzmet kórsetýge arnalǵan mobıldi HQO-nyń qyzmetkerlerin jiberip, qajetti qujattar men ótinishin qabyldadyq», deıdi fılıal dırektory Erjan Jeńisbekov.
Mamandar Erkinaıǵa týý týraly kýáligin tabystap, balalardyń týýyna baılanysty jáne bir jasqa deıingi járdemaqy taǵaıyndaý qyzmetteri boıynsha qujattardy qabyldap, ótinishti ýákiletti organdarǵa jiberdi. Endi qarasha aıynyń basynda jas ata-ana ózderine jáne balalaryna tıesili memlekettik tólemderge ıe bolady.
«Balalarymnyń járdemaqylaryn alý úshin qujat tapsyrýǵa barýǵa múmkindigim bolmaı júrgen edi. HQO-nyń qyzmetkerleri qujattarymdy úıde otyryp ótkizýge kómektesti. Qatty qýanyp qaldym. Mamandar maǵan gúl syılap, quttyqtap, jyly lebizderin jetkizdi. Meniń qınalyp otyrǵanymdy estip, jedel áreket jasaǵan HQO-nyń mamandaryna alǵys bildiremin», deıdi jas ana.
Túrkistan oblysy