Elbasy Ábý-Dabıdiń taq murageri, Birikken Arab Ámirlikteriniń Qarýly kúshteri Joǵarǵy Bas qolbasshysynyń orynbasary sheıh Muhammed ben Zaıd Ál Nahaıanmen telefon arqyly sóılesti, dep habarlaıdy Egemen.kz elbasy.kz-ke silteme jasap.
Áńgime barysynda Elbasy men Ábý-Dabıdiń taq murageri Qazaqstan Respýblıkasy men Birikken Arab Ámirlikteri arasyndaǵy dástúrli dostyq qarym-qatynastardyń qarqyndy damyp kele jatqanyn erekshe atap ótti.
Osy oraıda Nursultan Nazarbaev pen sheıh Muhammed ben Zaıd Ál Nahaıan jýyrda Qazaqstan Respýblıkasynyń Premer-Mınıstri Asqar Mamınniń Ábý-Dabı qalasyna jasaǵan jumys saparynyń nátıjelerine nazar aýdardy.
Sapar aıasynda Qazaqstanda ónerkásip, aýyl sharýashylyǵy, energetıka, munaı hımııasy jáne farmasevtıka sııaqty salalarda jańa ınvestısııalyq jobalardy iske asyrý týraly úkimetaralyq qujatqa qol qoıylǵan bolatyn.
Sondaı-aq taraptar qazirgi ýaqytta qalalyq jáne týrıstik ınfraqurylymnyń aýqymdy qurylysy júrip jatqan Túrkistandy qaıta túletý taqyrybyna toqtaldy. Sońynda Elbasy men Ábý-Dabıdiń taq murageri baýyrlas eki memleket arasyndaǵy yntymaqtastyqtyń odan ári tereńdeıtinine jáne keńeıe túsetinine senim bildirdi.