Elordanyń Saryarqa aýdanyna qarasty Kóktal-1 yqshamaýdanynda jańa saıabaq ashyldy, dep habarlaıdy Egemen.kz. Bul jaıynda shahar basshysy Altaı Kólginov málimet taratty.
"Nur-Sultan qalasynda elorda turǵyndary men qonaqtary bos ýaqytyn tıimdi ótkize alatyn oryndar sany artyp keledi. Bıyl qaýipsiz jáne jaıly qoǵamdyq keńistikter birneshe ese kóbeıdi. Karantın ýaqytynda olardyń qanshalyqty qajet ekeni kórinip-aq turdy. Kóktal-1 eldi mekeninde 16 gektarǵa jýyq saıabaq ashyldy. Jańa keńistik úsh úlken aımaqqa bólingen. Birinshisi - tynysh demalys aımaǵy. Munda, mysaly, amfı-teatr ornatyldy - ashyq aspan astynda kınoteatr uıymdastyrýǵa bolady. Sonymen qatar rotýnda da bar. Jastar úılený toıyn ótkize alady. Tynysh aımaqta serýendeý jáne demalý úshin qolaıly jaǵdaılar jasalǵan", dep jazdy qala ákimi Instagram paraqshasynda.
Onyń aıtýynsha, ekinshi aımaq sportpen shuǵyldanýǵa arnalǵan. Aımaq basketbol, fýtbol, voleıbol alańdarymen, tennıs kortymen, vorkaýt jáne ıoga alańymen jabdyqtalǵan. Barlyq sport alańdary qorshalǵan.