Jambyl oblysynda densaýlyq saqtaý mekemeleriniń materıaldyq-tehnıkalyq bazasy jańartylýda. Búgin saltanatty jaǵdaıda oblys basshysy Berdibek Saparbaev medısına qyzmetkerlerine zamanaýı jabdyqtarmen jabdyqtalǵan jańa avtokólikterdiń kiltterin tabystady, dep habarlaıdy Egemen.kz oblys ákiminiń baspasóz qyzmetine silteme jasap.
Otandyq óndiristerde jabdyqtalǵan jyljymaly medısınalyq dıagnostıkalyq keshender segiz aýdandyq aýrýhananyń balansyna berildi. Sondaı-aq, oblystyq jedel járdem stansııasynyń parki "Hyundai" markaly 18 reanımobılmen tolyqty.
"Memleket basshysynyń negizgi saıasatynyń basym baǵyttarynyń biri – Densaýlyq saqtaý salasyn jańǵyrtý. Barlyq resýrstar qazaqstandyqtardyń ómiri men densaýlyǵyn qorǵaýǵa baǵyttalýy kerek. Medısınalyq uıymdar qajetti qural-jabdyqtarmen qamtamasyz etilip, tósek qory men ınfraqurylymy jańartylýda. Dárigerlerdiń jalaqysy kóterilýde. Bizdiń oblysta densaýlyq saqtaý salasyna shamamen 5 mıllıard teńge ınvestısııa salyndy.
Qazirgi tańda koronavırýstyń yqtımal ekinshi tolqynyna qyzý daıyndyq júrýde. Atap aıtsaq, eki aılyq dári-dármek qory qalyptasyp, 2530 tósek-oryn daıyndaldy, jabdyqtar satyp alynýda. Asfendııarov atyndaǵy Ulttyq medısınalyq ýnıversıtetimen birlesip kadrlardy daıarlaý boıynsha isi qolǵa alynyp jatyr", - degen Berdibek Saparbaev medısına qyzmetkerlerine janqııarlyq eńbekteri úshin alǵys bildirip.
Ol jańa tehnologııa dárigerlerdiń naýqastarǵa jetýin tezdetip, medısınalyq kómektiń sapasyn arttyratynyna senim bildirdi.
Medısınalyq jyljymaly keshender jalpy qabyldaý bólmeleri, akýsher-gınekolog, sáýlelik dıagnostıka, jalpy tájirıbelik dáriger alańdary, taldaýlar qabyldaý orny, dárihana pýnkti, saraptamalyq klastaǵy portatıvti ÝDZ, aınalasyna qaýipsiz rentgen jáne flıýorografııamen qamtylǵan. Múmkindigi shekteýli jandarǵa arnalǵan pandýs-lıfti bar.
Aýyl turǵyndaryna tar beıindi mamandar qyzmet kórsetedi. Olarǵa "Taza júrek" aksııasyna qatysýshy – medısınalyq eriktiler kómektespek.
Densaýlyq saqtaý basqarmasynyń basshysy Áset Qalıev buǵan deıin oblystyń úsh aýdany jyljymaly medısınalyq dıagnostıkalyq keshenge ıe bolǵanyn atap ótti. Al, búgingi keshender qalǵan aýdandyq aýrýhanalarǵa jetkiziledi. Osylaısha, barlyq on aýdan jáne oblys ortalyǵy jyljymaly keshendermen qamtamasyz etilip otyr.
"Taǵy 48 jedel járdem kóligi satyp alynady. Jedel járdem men jyljymaly medısınalyq keshender dárigerlerdiń shalǵaıdaǵy aýyldarǵa jetýine kómektesedi",- dedi Áset Qalıev.
Aımaqtyń bas dárigeri koronavırýspen kúresýge tórt myńnan astam medısınalyq qyzmetker tartylǵanyn aıtty.
"Juqtyrý qaýpi joǵary aımaqta jumys isteıtin medısına qyzmetkerlerine aı saıynǵy ústemaqy tólenedi. Tólemder Densaýlyq saqtaý mınıstrliginiń buıryǵyna sáıkes júzege asyrylady. Koronavırýspen aýyrǵan jalpy 275 medısına qyzmetkeri 2 mıllıon teńge kóleminde tólemge qol jetkizdi. Olar epıdemııaǵa qarsy sharalarǵa qatysqan. Qaıtys bolǵan 20 medısına qyzmetkeriniń otbasylaryna 10 mıllıon teńgeden berildi", - dedi Áset Qalıev.
Saltanatty shara barysynda 12 jambyldyq densaýlyq saqtaý qyzmetkeri "Halyq alǵysy" medalimen marapattaldy.
О́z kezeginde medısına qyzmetkerleri de jan-jaqty qoldaýlarǵa rızashylyqtaryn bildirdi. Dárigerler osyndaı keshenderdiń arqasynda aýyl turǵyndaryna sapaly kómek kórsete alatyndyqtaryn, bul oblys turǵyndarynyń densaýlyǵyn jaqsartýǵa yqpal etetindigin atap ótti.