Halyqaralyq fýtbol federasııasynyń (FIFA) resmı saıtynda fýtboldan ulttyq quramalardyń qazan aıyna arnalǵan reıtıngi jarııalandy. Jańarǵan reıtıngte Qazaqstan bir saty tómendep, 119-orynǵa turaqtady.
Jalpy ótken aıdaǵy reıtıngpen salystyrar bolsaq, kósh basyndaǵy quramalarda anaý aıtqandaı ózgeris joq. Birinshi orynda ádettegideı 1765 upaımen Belgııa quramasy. 2018 jylǵy álem chempıony – Fransııa (1752) ekinshi orynda, Brazılııa (1725) – úzdik úshtikte.
Aıta keteıik, osy aıda Mıhal Bılek shákirtteri Ulttar lıgasy aıasynda eki oıyn ótkizgen bolatyn. Almatyda ótken oıynda Albanııamen teń tússe (0:0), syrt alańdaǵy kezdesýde Belarýs quramasynan 2:0 esebimen jeńildi.