Almatyda 511 avtobýs júrgizýshisi jaýapkershilikke tartyldy, dep habarlaıdy Egemen.kz
Almaty qalasynda 21-23 qazan aralyǵynda "Avtobýs" jedel-aldyn alý sharasy ótkizilip jatyr. Qazir polısııa avtokóliktik kásiporyndary men jolaýshylar tasymalyn júzege asyratyn jeke kásipkerlerdiń, azamattardy tasymaldaý qaýipsizdigi talaptaryna sáıkestigin tekserýde.
Qaladaǵy avtobýstardyń tehnıkalyq jaǵdaıyna jáne balalardy tasymaldaýmen aınalysatyn júrgizýshilerdiń jol erejelerin saqtaýyna erekshe nazar aýdarylady.
Reıdke 1694 polısııa qyzmetkeri jumyldyrylǵan. Onyń 1448-i – patrýldik polısııa qyzmetkeri, 210 – ýchaskelik polısııa ınspektory, 36 – ishki ister organdarynyń basqa bólimderiniń qyzmetkeri.
Osy ýaqytqa deıin barlyǵy 511 júrgizýshi ákimshilik jaýapkershilikke tartyldy. Onyń ishinde Jolaýshylardy, bagajdy jáne júkterdi tasymaldaý erejelerin buzǵan 56 júrgizýshi, eńbek jáne demalys rejımin buzǵan – úsh, kóligin tıisti ruqsatsyz qaıta jabdyqtaǵan – 31, sapar aldyndaǵy tekserýden jáne medısınalyq tekserýden ótpegen – 22, memlekettik nemese mindetti tekserýden ótpegen – 27, kólik júrgizý barysynda uıaly telefondy paıdalanǵan – 189, manevr jasaý erejelerin buzǵan – 175, qarsy jolaqqa shyǵyp ketken – 4, kólikti mas kúıinde basqarǵan – 1, mindetti saqtandyrý týraly zańnamany buzǵan 5 júrgizýshi jaýapkershilikke tartyldy.
"Aıyppul turaǵyna 20 avtobýs qoıyldy, 26 memlekettik nómir sheship alyndy, ruqsat etilmegen 9 turaq jabyldy, 6 avtobýs parkiniń laýazymdy tulǵalary ákimshilik jaýapkershilikke tartyldy, 49 avtobýstyń jylý, elektr jabdyqtarynyń sáıkestigi tekserildi. Sonymen qatar, zańsyz qosymsha jabdyqtalǵan avtobýstardyń, sondaı-aq tehnıkalyq jaǵdaıy men qurylymy belgilengen jol qaýipsizdigi talaptaryna sáıkes kelmeıtin avtobýstar men taksılerdiń jumysyna tyıym salý boıynsha sharalar qabyldanady", dedi Almaty qalalyq PD jergilikti Polısııa qyzmeti basqarmasynyń bastyǵy Manap Sattarov.
Málim etilgendeı, zańsyz mıgranttar men tasymaldaýshylardy anyqtaý maqsatynda kóshi-qon polısııasy tranzıttik kólikterdi tekseretin bolady.