Bokstan bıylǵy el birinshiligi qarasha aıynda Shymkent qalasynda ótetin bolyp bekitildi. Bul týraly Qazaqstan boks federasııasynyń baspasóz qyzmeti málimdedi.
«Qazaqstan boks federasııasy 2020 jylǵy el birinshiligin ótkizý úshin Shymkent qalasyn tańdap aldy. Erler de, áıelder de bir mezette synǵa túsetin doda 23-29 qarasha aralyǵynda ótedi. Shymkent qalasynyń respýblıkalyq jarystardy uıymdastyrýda tájirıbesi mol. Sondyqtan chempıonat sátti ótedi degen senimdemiz», deıdi QBF prezıdenti Keńes Raqyshev.
Shymkent qalasy 2017 jyly el birinshiligin, 2019 jyly V jazǵy Spartakıadany abyroımen ótkizgen. Koronavırýstyń aldyn alý jónindegi vedomstvoaralyq komıssııanyń málimeti boıynsha, Shymkent qalasy men Túrkistan oblysy epıdemııalyq jaǵdaı turaqty sanalatyn «jasyl aımaqqa» enedi. Atalǵan óńirde vırýs juqtyrǵandar az tirkelýde.
«Biz Shymkent qalasynyń bas sanıtar dárigerinen ruqsat aldyq, endi elimizdiń bar aımaǵynan keletin sportshylardy qabyldaýǵa daıyndalyp jatyrmyz. Bul erler men áıelder arasyndaǵy doda birlese ótkiziletin alǵashqy birinshilik bolmaq. О́kinishke qaraı, zalǵa kórermender kirgizilmeıdi. Al biz ulttyq chempıonatty joǵary deńgeıde ótkizý úshin bar kúshimizdi salamyz», deıdi Shymkent boks federasııasynyń atqarýshy dırektory Rahmanbek Arǵymbaev.
Al ulttyq quramanyń bas bapkeri Ǵalymbek Kenjebaevtyń aıtýynsha, quramada júrgen barlyq sportshy karantın ýaqytynda bos jatpaı, bári óz betterinshe jattyǵý jasaǵan. Keıinnen Almatydaǵy AIBA akademııasynda bas qosyp, eki oqý jattyǵý jıynyn ótkizgen. Qazirgi tańda barlyǵy óz oblysynyń jigitterimen ishki birinshilikke tyńǵylyqty daıyndalyp jatyr. Sondaı-aq bas bapker jarty jyldan asa sharshy alańǵa shyqpaǵan shákirtteriniń kúshi boıyna syımaı, barlyǵy tezirek jekpe-jek ótkizýge asyǵyp jatqanyn jetkizdi.
«Karantınge qaramastan, boksshylar daıyndyǵyn toqtatqan joq. Federasııanyń jańa prezıdenti Keńes Raqyshevtiń qamqorlyǵynyń arqasynda ýaqytynda qarjylandyrý aldy. Qazaqstan boks federasııasynyń qurmetti prezıdenti Tımýr Qulybaevtyń tapsyrmasy boıynsha sportshylarǵa jańa sporttyq forma berildi. Bizge jetispeıtin jalǵyz nárse – básekelestik rýhy, naǵyz jaýyngerlik tájirıbe, onsyz boksshylardyń sheberligi óspeıdi. Jarysta ózderin jaqsy qyrynan kórsetken jigitter ulttyq quramaǵa alynyp, aldaǵy ýaqytta el namysyn qorǵaıtyn bolady. Sondyqtan biz osy chempıonattan keıin jańa boksshylarmen quramany jańartamyz degen oıdamyn. Al jeltoqsannan bastap shetelge jıyndar men týrnırlerge shyǵamyz dep úmittenemin», deıdi bas bapker.
Aıta keteıik, chempıonatty Qazsport telearnasy tikeleı efırde kórsetýdi josparlap otyr.