Úkimet jer telimderin ıgerý men «Aq bulaq» baǵdarlamasynyń oryndalý barysyn qarady
Premer-Mınıstr Serik Ahmetov tóraǵalyq etken Úkimettiń keshegi selektorlyq rejimdegi otyrysynda ózekti eki másele – paıdalanylmaı jatqan jerlerdi memleket menshigine qaıtarý sharasy men «Aq bulaq» baǵdarlamasyn iske asyrý barysy talqylandy.
Úkimet jer telimderin ıgerý men «Aq bulaq» baǵdarlamasynyń oryndalý barysyn qarady
Premer-Mınıstr Serik Ahmetov tóraǵalyq etken Úkimettiń keshegi selektorlyq rejimdegi otyrysynda ózekti eki másele – paıdalanylmaı jatqan jerlerdi memleket menshigine qaıtarý sharasy men «Aq bulaq» baǵdarlamasyn iske asyrý barysy talqylandy.
Birinshi másele boıynsha О́ńirlik damý mınıstri Bolat Jámishev baıandama jasady. «Elimizde túgendeýge jatqyzylǵan 90,0 mln. gektar aýyl sharýashylyǵy alqaptarynyń 30,6 mln. gektaryna túgendeý sharasy júrgizildi. Byltyr 7004 sharýashylyq sýbektilerinde 3100,6 myń gektar paıdalanylmaǵan jer anyqtalyp, onyń 400 myń gektary egistik ekeni naqtylansa, bıyl bul jumys odan ári óristedi. Júrgizilgen tekserýlerdiń nátıjesinde paıdalanylmaı jatqan jer ýchaskeleriniń ıeleri anyqtalyp, ákimshilik jazaǵa tartyldy. Jalpy somasy 4 170,8 myń teńgeniń aıyppuly salyndy», dedi mınıstr.
Sonymen, 2013 jyly qosymsha túgendeý jumystary júrgizilip, nátıjesinde 8,8 myń paıdalanylmaǵan jer telimderi anyqtalǵan. Jospar boıynsha barlyq jumys keshenin tolyq aıaqtaýǵa 53 ákimshilik aýdan men 6 qala jáne 80 aýyldyq okrýg qamtylǵan. Jyl sońyna deıin túgendeý sharasy qorytyndylanyp, zańmen belgilengen tártipte tıisti sharalar kelesi jyly qabyldanbaq. Tapsyrmasyn laıyqty oryndamaǵany úshin jer ınspeksııalarynyń laýazymdy tulǵalary tártiptik jaýapkershilikke tartylǵan. Mınıstrdiń aıtyp ótkenindeı, jeke turǵyn úı qurylysyna berilgen jer telimderin túgendeý jumystary jalǵasyp jatyr. Munda jer telimderin paıdalanbaǵany úshin 1235 jeke tulǵa jalpy somasy 81,6 mln. teńge aıyppul tólegen.
Qazirgi tańda jerdi tıimdi paıdalanýǵa qatysty keshendi jospar daıyndalýda. Sondaı-aq, salaǵa qatysty zańǵa túzetýler men tolyqtyrýlar engiziletin kórinedi. Onda mindetti túrde, paıdalanylmaı jatqan jerlerdi memlekettiń jer qoryna qaıtarý qaǵıdalary naqty kórsetilmek.
Jer telimderin túgendeý taqyryby boıynsha Aqmola oblysynyń ákimi Q.Aıtmuhametov pen Ońtústik Qazaqstan oblysynyń ákimi A.Myrzahmetov sóz sóıledi. Olar óz óńirlerindegi salaǵa qatysty máselelerdi ortaǵa saldy.
Atalǵan máselege baılanysty talqylaýdy qorytyndylaǵan Úkimet basshysy jer telimderin memleket menshigine qaıtarý jumystarynda belsendilikti barynsha arttyrý qajet ekenin taǵy bir eske saldy. Qaıtarylǵan jerler – ekonomıkamyzdyń qosymsha rezervi ekendigin atap kórsetken S.Ahmetov salaǵa qatysty zańǵa tolyqtyrýlar men túzetýler engizgende jerdi paıdalanýǵa berýdiń jáne qaıtaryp alý men baqylaýda ustaýdyń tetikterin jetildirý kerektigin de shegelep ótti.
О́ńirlik damý mınıstri men Aqmola oblysynyń jáne Astana qalasynyń ákimderine Astananyń mańyndaǵy jerlerde jeke turǵyn úı qurylysyn júrgizý úshin jerdi ıgerýdiń keshendi josparyn jasap, Úkimetke usynystar engizýdi tapsyrdy.
«Astana qalasy mańyndaǵy 30 shaqyrymdyq aımaqta barlyq aýyldyq eldi mekender elordamyzdyń syrtqy kelbetine saı bolýy tıis. Munda problemalarmen qatar úlken múmkindikter men úlken áleýet te bar», – degen S.Ahmetov Úkimettiń ınfraqurylymdy damytýǵa jáne Astana aınalasyndaǵy aýyldardyń syrtqy kelbetin ózgertýge qoldaý kórsetýge daıyn ekenin atap ótti. О́ńirlik damý mınıstrligine aýyl sharýashylyǵyna paıdalanatyn jerlerdi túgendeý jumystaryn kelesi jyldyń sońyna deıin aıaqtaýdy júktedi. Al oblystar men Astana jáne Almaty qalalarynyń ákimderine jeke turǵyn úı salýǵa berilip, biraq ıgerilmegen ıesiz jer telimderin qaıtarý, jerlerdi óz betimen basyp alýǵa jol bermeý jónindegi jumystardy odan ári jalǵastyrýdy, toqsan saıyn О́ńirlik damý mınıstrligine atqarylǵan jumystar týraly aqparat berip otyrýdy mindettedi.
Úkimet otyrysynda, 2011-2020 jyldarǵa arnalǵan «Aq bulaq» baǵdarlamasyn júzege asyrý máseleleri de talqylandy. Ony júzege asyrý barysy týraly О́ńirlik damý mınıstri B.Jámishev, Qorshaǵan orta jáne sý resýrstary mınıstri N.Qapparov baıandama jasady. Sonymen qatar, Qostanaı oblysynyń ákimi N.Sádýaqasov pen Atyraý oblysynyń ákimi B.Izmuhambetovtiń jumystary tyńdaldy.
Memleket basshysynyń tapsyrmasymen sý resýrstaryn basqarýdyń memlekettik baǵdarlamasyn ázirleý aıaqtalyp keledi. Onda 2020 jylǵa deıin halyqty aýyz sýmen qamtamasyz etýdi sheshýdiń joldary qarastyrylǵan», – dep sózin jalǵaǵan S.Ahmetov osyǵan deıin júrgizilgen jumystarda bıýdjet qarajattaryn urlaý jáne memlekettik satyp alý prosedýralaryn buzý sekildi keleńsizdikterdiń oryn alǵandyǵyn atap ótti. Jergilikti atqarýshy jáne quzyretti organdar tarapynan qurylysty júrgizý men bıýdjettik qarajattyń jumsalýyna laıyqty baqylaýdyń bolmaı otyrǵandyǵyn, sóıtip, bul máseleniń Úkimettiń keńeıtilgen otyrysynda Memleket basshysynyń ádil synyna ilikkenin eske saldy. Atalǵan másele boıynsha, birqatar tapsyrmalar berdi.
О́ńirlik damý, Qorshaǵan orta jáne sý resýrstary, Indýstrııa mınıstrlikterine baǵdarlamany júzege asyrý barysyn, al oblys ákimderine sýmen jabdyqtaýdy jáne sý burý nysandaryn jobalaýdy júktedi. Budan ózge, nysandardy paıdalanýǵa berý merzimderiniń oryndalmaýyna jáne qarajattyń ıgerilmeýine jol bergen laýazymdy tulǵalardyń jeke jaýapkershilik máselesin qaraýdy qadap aıtty.
Nurbaı ELMURATOV,
«Egemen Qazaqstan».