О́tken demalys kúnderi Taraz dúkenderinde nan baǵasy 5-10 teńgege ósken edi. Bul sheshim jergilikti bılikpen kelisilmegen kúıi qabyldanǵan. Jedel shtab qazir jaǵdaıdy jan-jaqty zerttep jatyr, dep habarlaıdy Egemen.kz oblys ákiminiń baspasóz qyzmetine silteme jasap.
Oblys ákimdigi tarapynan shuǵyl shara qabyldanǵannyń arqasynda dúısenbi kúni iri saýda oryndarynda as atasy burynǵydaı 85 teńgeden satyla bastady. Tek aýlalardaǵy shaǵyn dúkenderdiń keıbirinde nan 5-10 teńgege qymbatyraq bosatylyp jatyr.
Qalada negizgi 6 naýbaıhana bar. Olardyń beseýi baǵany ósirý týraly sheshimge kelgen kórinedi. Nannyń qymbattaýyn olar soltústik óńirlerden keletin un qunynyń ósimimen túsindirip otyr.
Oblys ákiminiń orynbasary Berik Nyǵmashev turǵyndardy sabyrǵa shaqyryp, jaǵdaıdyń retteletinin jetkizdi.
"Monıtorıng kezinde birqatar nan óndirýshileri nan baǵasyn 85-ten 95 teńgege deıin ósirgeni anyqtaldy. qazir jedel shtab bunyń qanshalyqty qısyndy ekenin anyqtaý maqsatynda tekseris júrgizýde. Jergilikti bılikpen aqyldaspaı áreket etken kásipkerler jaýapqy tartylady", - dedi ol.
Tıisti monıtorıng jumystary monopolııaǵa qarsy jáne salyq organdarymen birlese júrgizilýde.
"Nan baǵasy birneshe faktorlarǵa baılanysty. Biraq eń negizgisi – unnyń baǵasyna kelip tireledi. Al, qazir unnyń quny 115 teńgeden 130-140 teńgege deıin ósip ketken",- dep atap ótti Berik Nyǵmashev.
Oblys ákiminiń orynbasary qalyptasqan jaǵdaıdy jan-jaqty zerdeleý úshin barlyq sharalar qoldanylady dep sendirdi.
"Esterińizde bolar, ótken jyly osy ýaqytta nan baǵasy ósken bolatyn. Sondyqtan da bıyl nan baǵasyn ustap turýǵa baǵyttalǵan aldyn alý sharalary qabyldanyp, naýbaıhanalarǵa un naýryz aıynan qazanǵa deıin turaqtandyrý qorynan tómen baǵamen berilgen. Qazir turaqtandyrý qorynda 500 tonna un bar. Qosymsha taǵy 2 000 tonna alynady. Oblys ákimi áleýmettik mańyzy bar taýarlar, onyń ishinde nannyń baǵasyn negizsiz ósirýge jol bermeýdi tapsyrdy. Biz jaǵdaıdy turaqtandyrý úshin barlyq sharalardy qoldanatyn bolamyz. Qajetti resýrstarymyz jetkilikti. "Taraz" ÁKK un satyp alyp, nan óndirýshilerge tómendetilgen baǵamen usynbaq", - deıdi oblys ákiminiń orynbasary.
Sóz sońynda Berik Nyǵmashev Tarazdaǵy nan baǵasy basqa óńirlermen salystyrǵanda arzan ekenin atap ótti. Sonymen qatar, "Taraz" ÁKK áleýmettik dúkenderinde as atasy 55 teńgeden satylýda.