Densaýlyq saqtaý mınıstri Alekseı Soı «COVID-19 – BMSK úshin úlken sabaq» atty halyqaralyq ǵylymı-praktıkalyq konferensııaǵa qatysyp, pandemııa kezinde elimizdegi alǵashqy medısınalyq kómek kórsetý júıesin damytýdyń negizgi máselelerin talqylady.
Atalǵan konferensııa DDU Eýropalyq densaýlyq saqtaý ortalyǵy, DDU Qazaqstandaǵy ókildigi, Grýzııa, Lıtva jáne Ýkraına elderinen kelgen dáriger, ǵalym, sarapshylar men óńirlerdegi dárigerlerdiń basyn qosty. Bul BMSK jónindegi 1978 jylǵy Almaty deklarasııasynda aıqyndalǵan halyqtyń densaýlyǵyn saqtaýdaǵy alǵashqy medısınalyq-sanıtarlyq kómektiń mańyzdylyǵyn túsinýden týyndap otyr.
«Memleket basshysy BMSK-ny uıymdastyrý ádisin túbegeıli qaıta qaraýdy tapsyrdy. Emhanalardyń jumysy belsendi, formaty jaǵynan halyqqa yńǵaıly bolýy tıis jáne qyzmet kórsetý kólemin arttyrý kerek. Búginde alǵashqy medısınalyq-sanıtarlyq kómek densaýlyq saqtaý júıesiniń mańyzdy bóligi. Kóptegen medısınalyq-áleýmettik máseleniń sheshimi osy BMSK-nyń tıimdiligine baılanysty. Koronavırýs ınfeksııasynyń aldyn alýda BMSK-nyń róli óte mańyzdy», dedi A.Soı.
Mınıstrdiń aıtýynsha, COVID-19 pandemııasy memleketter men qaýymdastyqtardyń, eń aldymen densaýlyq saqtaý júıesiniń zamanaýı jahandyq syn-qaterge daıyndyǵyn baǵdarlaıtyn ındıkatorǵa aınaldy. Al Qazaqstan koronavırýs ınfeksııasynyń alǵashqy tolqynynan alǵan sabaǵy – BMSK-ny nyǵaıtý.
A.Soı konferensııany uıymdastyrýshylarǵa rızashylyǵyn bildirip, medısına ǵylymdarynyń doktory, professor, UǴA akademıgi, Memlekettik syılyqtyń laýreaty Tóregeldi Sharmanovty 90 jasqa tolǵan týǵan kúnimen quttyqtady.
Professor óz sózinde Almaty deklarasııasy 1978 jylǵy 12 qyrkúıekte «Densaýlyq barshaǵa» uranymen ótken alǵashqy medısınalyq-sanıtarlyq kómek jónindegi halyqaralyq konferensııanyń sońǵy kúni qabyldanǵanyn eske saldy. Ýtopııaǵa qaramastan, bul uran jáne oǵan engizilgen qaǵıdalar álemdik densaýlyq saqtaýdy damytýda mańyzdy ról atqardy. Almaty deklarasııasy álemdik tarıhqa «Densaýlyq saqtaýdyń uly hartııasy» retinde endi. 10 tarmaq, úsh betten turatyn qujat álemdik densaýlyq saqtaýdyń irgeli negizderin, alǵash ret azamattardyń óz densaýlyǵy úshin quqyqtary men jeke jaýapkershiligin, sondaı-aq memlekettiń óz azamattarynyń densaýlyǵy úshin mindetterin aıqyndap berdi.
«Deklarasııa qaýipsiz qorshaǵan ortany, sýdy, taǵamdy, ana men bala densaýlyǵyn nyǵaıtýda medısınalyq kómekti, dári-dármekpen qamtamasyz etý úshin barlyq qajetti resýrstardy jumyldyrý arqyly qol jetkiziletinin anyqtady. Búgingi tańda bul qaǵıdattar aıqyn kóringenimen, 42 jyl buryn ol álemniń kóptegen eli úshin densaýlyq saqtaý salasyndaǵy basymdyqtarǵa ıe bolyp, alǵashqy medısınalyq-sanıtarlyq kómekti damytýdy ózderiniń basty mindeti retinde aıqyndaýǵa sep boldy», dedi T.Sharmanov.
Forým barysynda qatysýshylar ózekti medısınalyq máselelerdi talqylap, óz tájirıbesimen bólisti.
Atalǵan konferensııa BMSK boıynsha Almaty deklarasııasynyń 42 jyldyǵyna arnalady, sondaı-aq akademık Tóregeldi Sharmanovtyń 90 jasqa tolǵan mereıtoıy jáne Qaraǵandy medısına ýnıversıtetiniń 70 jyldyǵy da atap ótildi.