О́tken aptanyń juma-senbi kúni fýtboldan Qazaqstan chempıonatynyń 16-týr oıyndary ótti. Bul týrda týrnır kestesinde alǵashqy tórttikte kele jatqan tórt komanda bir-birimen kezdesip, qaı klýb qaı orynǵa laıyq ekenin baıqatty. Qatarynan besinshi márte jeńiske jetken Almatynyń «Qaıraty» uzaq kútken chempıondyǵyna bir taban jaqyndaı tústi.
«Ordabasy» – «Tobyl» 0:3
Chempıonat basynda birinshiliktiń bas júldesine úmitti bolǵan «Ordabasy» men «Tobyl» klýbtary maýsym aıaqtalar tusta josparlaryna ózgeris engizip, endi júldeli úshinshi oryn úshin talasqa kiristi. Osydan bir jarym aı burynǵy oıynda «Ordabasy» «Tobyldy» 4:0 esebimen oısyrata jeńip edi. Sol eseni osy týrda qaıtarýdy kózdegen qostanaılyq ujym maqsatyna jetti. Tımýr Segizbaev atyndaǵy stadıonda ótken básekede «Tobyl» «Ordabasy» qaqpasyna jaýapsyz úsh gol soqty. 15-týrda «Kaspıı» qaqpasyna eki gol soǵyp, «Ordabasyǵa» jeńis syılaǵan qaharman shabýylshy Joaý Paýlo bul joly komandasyna kómektese almady. «Tobyl» klýbynan 48-mınýtta Rýslan Valıýllın, 64-mınýtta Senın Sebaı mergendigimen kózge tússe, 56-mınýtta Vıktor Dmıtrenko abaısyzda óz qaqpasyna gol soǵyp aldy.
Bul oıynnan keıin eki komanda da týrnır kestesindegi óz oryndaryn saqtap qaldy. «Ordabasy» 27 upaımen úshinshi orynda tursa, bir oıyn kem ótkizgen «Tobyl» 26 upaımen tórtinshi orynda keledi.
«Astana» – «Qaırat» 0:1
Jankúıerler asyǵa kútken chempıonattaǵy ekinshi «El-Klasıkoda» da «Qaırat» klýbynyń mereıi ústem boldy. 4 qazandaǵy birinshi oıynda almatylyq komanda 3:0 esebimen elimizdiń alty dúrkin chempıondarynyń tas talqanyn shyǵarsa, bul joly 1 dop aıyrmasymen jeńdi. Jalpy, bul kezdesýdiń aldynda fýtbol mamandary «Astana» jeńiske jetedi dep boljaǵan-dy. О́ıtkeni elorda klýbynyń tizginin reseılik maman Andreı Tıhonov ustaǵannan keıin jáne jaraqatyna baılanysty birqatar oıyndy ótkizip alǵan negizgi quramnyń fýtbolshylary qatarǵa qosylǵan soń «Astananyń» oıyny ózgerip shyǵa keldi. Sondaı-aq bul kezdesý tabıǵı emes, jasandy alańda ótetini de elordalyqtardyń jeńiske jetýine tamasha múmkindik edi. Alaıda oıyn taǵdyryn jańadan kelgen bas bapker, ne jasandy alań emes, chempıonattyń surmergeni Abat Aıymbetovtiń soqqan jalǵyz goly sheship ketti.
Osylaısha týrnır kestesinde «Astanadan» 14 upaıǵa alǵa ozyp ketken «Qaırat» chempıondyqqa bir taban jaqyndaı tústi. Eger «Qaırat» kelesi týrda «Ordabasy» komandasyn da jeńetin bolsa, 16 jyldan keıingi alǵashqy chempıondyǵymen quttyqtaı berýge bolady. «Astananyń» «Qaırattan» bir oıyn kem ótkizgenin aıta keteıik.
«Qaısar» – «Kaspıı» 0:1
Qazan aıyn jeńispen bastaǵan «Kaspıı» aıdy jeńispen túıindedi. 1 qazanda «Astanany» 2:1 esebimen jeńgen aqtaýlyqtar bul jol «Qaısar» klýbynan basym tústi. Bir qyzyǵy, týrnır kestesinde 11-orynda kele jatqan «Kaspıı» jınaǵan 10 upaıynyń altaýyn dál osy «Qaısardan» tartyp aldy. Munaıshylardyń chempıonattaǵy nátıjesi óte nashar bolǵanymen, oıyndary táp-táýir. Tek sáttilik jetispeı júrgen syńaıly. Áıtpese kóp oıynda qarsylastaryna bir dop aıyrmashylyǵymen ese jiberip júr. Endi aldaǵy oıyndarda «Kaspıı» jeńis jolyn jalǵastyrmasa, kelesi jyly Birinshi lıgada óner kórsetýi ábden múmkin. Onsyz da ózderi bıyl ǵana joǵary lıgaǵa shyqqan bolatyn.
«Oqjetpes» – «Taraz» 0:0
Bul týrda gol soǵylmaǵan jalǵyz oıyn «Oqjetpes» pen «Taraz» arasynda ótti. О́tken matchta úsh upaıdan aıyrylǵan eki komanda da bul joly bir-bir upaıǵa razy boldy. 15-týrda «Oqjetpes» «Astanadan» 5:1 esebimen jeńilse, «Taraz» «Qyzyljarǵa» 1:0 nátıjesimen ese jiberdi. Ázirshe týrnır kestesinde «Tarazǵa» qaraǵanda «Oqjetpestiń» hali múshkil. 15 oıynda nebári 11 upaı jınaǵan kókshetaýlyqtar qaýipti aımaqta tur. Eger «Oqjetpestiń» oıyny osylaı jalǵasa berse, maýsym sońynda tómengi lıgaǵa túsip qalýy ǵajap emes.
«Qyzyljar» – «Jetisý» 2:1
16-týrdyń eń sońǵy oıyny Petropavldyń «Qyzyljar» jáne Taldyqorǵannyń «Jetisý» komandalary arasynda ótti. «Jas Qyran» stadıonyndaǵy kezdesýde «Qyzyljar» oıyn taǵdyryn birinshi taımda-aq sheship qoıdy. Kezdesýdiń 36-mınýtynda Tımýr Mýldınov mergendigimen kózge tússe, 45-mınýtta Maksım Drachenko penaltıdi sátti oryndap, esepti eseleı tústi. Úzilisten soń taldyqorǵandyqtar shıraq qımyldaı bastady. Kezdesýdiń 51-mınýtynda Artýras Jýlpanyń qaqpaǵa baǵyttaǵan soqqysy qaqpa torynan tabylyp, qonaqtar esep qysqartýǵa múmkindik aldy. Al matchtyń 87-mınýtynda ótken týrlardyń birinde «Jetisýdyń» qaharmanyna aınalǵan Aıbar Jaqsylyqov tártip buzyp, qyzyl qaǵaz aldy.